مونتيسوري مصر

مشاكل القراء المسجلة

Delivered to your Doorstep

Enter your email address:

Delivered by FeedBurner

Monday, October 13, 2008

عزيزى الرجل الشرقى ... أنا اُفضل أن أكون عشيقتك مش مراتك! - كلنا ليلى



ليه؟؟
أقول لك ليه ومش عايزة قلة أدب وطولة لسان! على رأى المثل: "ايش خد الريح من البلاط؟"، انت كـزوج عامل زى البلاط، وكله بالأدلة والبراهين بمقارنة بسيطة بين "برستــيــج" مراتك ووضع عشيقتك هـ تلاقى الآتى

وشك مقلوب وبوزك شبرين قدام الست بتاعتك كعلامة من علامات الرجولة والفحولة والسيطرة. أما بقى مع عشيقتك كله ضحك وهزار وكركعة للصبح لأنك ابن نكته وقعدتك ما يتشبعش منها

لو عندك مشكلة فى الشغل عيب تحكيها لمراتك علشان انت أسد وعيب صورتك تتهز قدامها. إنما عشيقتك هى العتبة اللى بـ ترمى عليها همومك وتفضفض معاها من غير ما تنقح عليك كرامتك

مراتك جاهلة ومش بـ تفهم لا فى الشغل ولا فى السياسة ولا فى البطيخ. لكن عشيقتك لازم تسمع آرائها باهتمام أحسن تحس إنك بـ تعرفها للجنس وبس

الهم والغم من نصيب أم العيال. والورد والهدايا والفسح والدلع والشخلعة من نصيب ست الحسن والجمال

الشخط والنطر من نصيب حرمكم المصون. والصوت الناعم والرقة والخفة لأمورتنا الحلوة

بيت الزوجية ريحته طبيخ مسبك حسب أوامر سيادتك. البيت التانى بقى ريحته مسك وعنبر برضه حسب أوامرك يا سى السيد

مراتك ولا تخرج ولا تنبسط ولا تشم هوا وإلا تبقى خرجت عن طوعك. أما عشيقتك فغصب عنك لازم تثق فيها وتسيب لها الحبل على الغارب

مراتك طالق لو لبست مايوه على البحر ونزلت الميه معاك ومع العيال. مشمشة قمر فى البيكينى وانت طبعا راجل متحضر وسافرت بلاد بره وفاهم الموضة

مراتك تسأل عن ماضيها بالتفاصيل لأنها اسم النبى حارسها هـ تشيل اسمك. أما أول جملة لتظبيط العشيقة بـ تقول فيها: احنا أولاد النهارده، وانت ليك عندها من يوم ما عرفتها

مراتك تحرم عليك لو صوتها على عليك فى لحظة فاض بيها وتجيب أبوها يربيها. عشيقتك برضه لحم ودم ولازم تستحملها وتاخدها فى حضنك لو اتعصبت ورميتك بطوبة

غيرة مراتك عليك شغل ستات وفضا وقلة عقل ودين. إنما غيرة عشيقتك على قلبك زى العسل وإلا تبقى مش بتحبك يا "بيبى"

السهرة مع المدام قدام التليفزيون ... والسهرة مع الشحرورة كلها رقص ومغنى وحكايات ولا ألف ليلة وليلة

مراتك تكون فى البيت الساعة 10 بالكتير. وعشيقتك تروح وتيجى وقت ما هىّ عايزة

الفانلة والبيجامة الكاستور لأم العيال. والحرير والبرفان المستورد للبرنسيسة

طلبات مراتك للبيت تبذير وقصر نظر وسفه حريم. وطلبات عشيقتك زى العسل على قلبك ... هو انت فديك الساعة لما نونو تطلب منك حاجة؟

مراتك تندبح لو لها صديق مذكر، لكن عشيقتك طبعا "كوول" ولها أصدقاء كتير وانت "سبور" وفاهم الكلام ده

الست مراتك تبقى فاجرة لو شربت سيجارة ولا ضحكت بصوت عالى. إنما الست التانية بقى بـ تبقى "سيكسى" موت وهى بـ تدخن وبـ تسكر وبـ ترقص

مراتك لو كلمتك فى الشغل تبقى خنقة ومش فاهمة إنك شايل المكتب على دماغك. وعشيقتك يوم لما تكلمك ده يبقى يوم المنى لأنك طبعا وحشتها

لو جاملت مراتك وجبرت خاطرها بكلمة حلوة تخاف لا تتمرع عليك. عشيقتك بقى لو غلطت فيها بكلمة هـ تعتذر بكام ورقة بـ 100 وهـ تذرف الدمع لغاية ما ترضى عنك

مع مراتك بـ تشيخ وتعجّز ألف قرن. مع عشيقتك "انت روح الشباب طعم الشباب"

فى بيتك انت عامل زى حكومة أحمد نظيف: "شادد الحزام ومقدم شهادة فقر". فى بيت مشمشة انت عامل زى حملة أوباما للرئاسة: "وعود وورود ومن جنيه لميت ألف!"

مراتك لازم تلبى نداءك فى فراش الزوجية وإلا الملايكة هـ تلعنها للصبح. أما عشيقتك فكله بالخناق إلا المزاج بالاتفاق ... وإلا هـ تطفش من وشك

مراتك أم العيال عيب تطلب منك حاجة كده ولا كده علشان تنبسط لحظة "اللى بالى بالك"، وإلا بقيت قليلة الأدب ولازم ترجع بيت أبوها. لكن قطتنا الجميلة طلباتها أوامر وأحلامها متعتك وكله تحت بند الدلع

سرير المدام كله شوك وانت زى ما تكون فى مهمة رسمية. السرير التانى بقى بـ يخلى الزمن يقف والفن والعبقرية كلها بـ تبان - لعل المعنى يكون مفهوم

واحدة اتدبست خلاص فـ تخبط دماغها فى الحيط. والتانية إيه اللى يغصبها على المر فلازم تراضيها وتحايلها


مراتك عصفور فى اليد واجب عليك تعذيبه وتنتيف ريشه حتى لا يطير. عشيقتك عصفور على الشجرة لو اتفزع أو زهق منك هـ يطير، فعليك بالبر والتغريد معه طوال الوقت

فاكرين سى السيد والست أمينة؟ فاكرين كانت غلبانة ومقهورة ومرعوبة من البيه بتاعها ازاى؟ طيب فاكرين هو كان قاسى وجامد ومتحجر معاها ازاى؟ افتكروا كمان بقى عشيقة سى السيد والدلع والهنا والحنية اللى كانت من نصيبها! افتكروا أى فيلم أو أى مسلسل كان فيه رجل شرقى "حمش ودكر" وافتكروا كان بـ يتصرف ازاى فى بيته وسط عياله: حاجة تغم وتقبض القلب. افتكروا بقى نفس الراجل ده مع عشيقته: سبحان مغيّر الأحوال

قولوا لى بقى الزوجة هنا كسبت إيه؟ اتبهدلت واتنكدت واتقيدت وكل احتياجاتها اتسفهّت. حد قال الشرعية؟ حد قال الشرف؟ شرعية إيه وشرف إيه لما الدنيا كلها بـ تمصمص شفايفها على حالها اللى يصعب على الكافر؟! حالها وقف واتكتب عليها الهم فى البيت والفضيحة بره البيت ... آه فضيحة لأن كل الناس عارفة إن جوزها مطلع عينها وبـ يخونها وسايبها فى البيت تربى العيال وهو بـ يشوف مزاجه. العار والشرف وجهان لعملة واحدة ... وفى المقارنة ما بين معاملة الرجل الشرقى لمراته ومعاملته لعشيقته أى حد هـ يفهم إن العار كان من نصيب الزوجة! وفى النهاية أحب اسألكم: تاكلوا زفت لوحدكم ولا تاكلوا تفاح مع الناس؟؟

نشرت فى مجلة احنا فى اغسطس 2008

8 comments:

Anonymous said...

شوفى كل الكلام اللى مكتوب ده صح بس كل ده الفرق بين ما يفعله الرجل لزوجته وما يفعله لعشيقته ولكن نصف الموضوع تقريبا مفقود وهو الفرق بين ما تفعله العشيق لرجلها وما تفعله الزوجه
حتي نكون منصفين

Anonymous said...

حلو أوي أسلوبك الساخر يا مروة، غاية في الروعة.
بس عشيقة ايه اللي بتقدم وزوجة مين يا أخ اسامة! إزاي تقارن بين ست فاضلة بتربي أولادها وعاهرة كل يوم نايمة مع واحد شكل؟!
والله الجواز مسئولية كبيرة والرجل اللي مش قد الجواز ميتنيلش على عينه وأشرفله يقضيها كل يوم مع واحدة من عاهرات الشوارع.
النوعية اللي اتكلمتي عنها يا مروة للأسف موجودة وبكثرة، وشفتها قدامي ومن غير تجميل أقل حاجة ممكن تتقال عنهم "رجالة ناقصة" ولا ليها صلة بالرجولة ولا التنجان الأبيض.
دي مراهقة متأخرة بتيجي للرجل اللي عنده نقص وحاسس إن شكله يقرف الكلب وحاسس إنه بقى مفيش حد ينفع يبصله فبيروح يدور على واحدة قد عياله -في الغالب- يعيش معاها في الحرام وهو زي النطع بيتمصلح عليه في الرايحة والجاية وسايب بيته وعياله.

دول ولا رجال ولا حتى أشباه رجال ومش هأقدر أقول غير إنهم فعلاً موجودين وبكثرة وطبعًا مش كله كده. المشكلة واحد من دول يوم ما يكتشف إن مراته بتخونه يقعد يصوت ويولول، طب ما طبيعي يا ابن الهبلة، والخيانة نتيحة تصرفاتك المتخلفة وعقليتك المتعفنة الأقل ما يمكن أن توصف به "واطية" ! زي ما يكون الخيانة حلال ليهم وحرام لهن. ما هي حرام للاتنين ومفيش فرق. حاجة تقرف بحد. واللي بيتخذ "عشيقة" حتى لو كويس في بيته، برضه واطي وكلب. بلا خيبة

Anonymous said...

كلامك صح والله ياميرو كل دة بيحصل انا مش عارفه الرجاله هتبطل طمع امتى مش عارف الرجاله ليه مش بتمله عنيهم وحدة عوزين ميت وحدة علشان يملو عنيهم .......واللى تستغربيلو ان وقت الخطوبه يحسسك انه هيشيلك فوق دماغه وهيخليلك الدنيا جنه وهيجبلك كل اللى عوزاه بس لما ظروفه تتحسن ولما يتجوزو وربنا يفتح عليه يبتدى بقى يلعب بديله ويبص بره وينسى اللى وقفت معاه وربتلو العيال وحاجات كتير .........يلا ربنا يهدى الرجاله ويبطلو طمع شوايه

Anonymous said...

Begad al article fazee3 gedan, Ana maiet 3ala nafsy men al de7k...

bas begad kol dah kalam mazboot gedan, bas don't blame the man so much because if you think about it. you will understand that the life between any couples is about BALANCE.

if she need him to be hard he must be hard, if she need him to be sweet he should be the sweetest person.

and the same for him also.

I think also one of the major problems is about the Routine we are falling in everyday, people need to find something new to do it, some fun, joy...

Thanks,
Mohammed

ربيع said...

مش شايفه انك بتبصي للموضوع نظرة ذكورية عقيمة؟ يعني ماحدش بيفكر التفكير المتطرف ده
طبعا انا ذد تماما ان الواحد يروح يتجوز و يبقى له عشيقة ، دي خيانة
كمان انا مش شايف ان فيه مشكلة في الجواز ، لو الواحد له عشيقة يتجوزها احسن ، هي ورقة و السلام
و بالتالي حالة استمرار العشيقة في كل الاحوال حالة غير معتاده بالنسبة ليا
بس برضو هابقى ذكر عقيم و أرد رد ذكوري عقيم متطرف بعيد عن افكاري

لا يا ستي ، برضو فيه فروق لصالح الزوجة
الزوجة لما بتحمل باكون سعيد ، و العيل بيشيل اسمي و باحبه ، لما العشيقة بتحمل باقلها نزليه ، و لو ولدت مش هاعترف بيه

لما العشيقة بتعيا باقولها الف سلامه ، لما الزوجة بتعيا باوديها للدكتور

لما الزوجة بتروح فرح باروح معاها ، لما العشيقة بتروح فرح طبعا مش هاروح ، من الآخر مش بابان قدام الناس مع العشيقة ، ده تفكير ذكوري محض

لو العشيقة قالتلي انا هاسيبك هاقوله في ستين سلامه ، الزوجة لو عايزه تتطلق بعينها!!! تفكير ذكوري برضو

و الموضوع في النهاية مش خناق ، انا شايف ان الذكوري المتسلط أبو مخ جزمة يروح يتنيل على عينه و ما يتجوزش اصلا ، و الغلط هنا غلط البنت اللي توافق على الجواز منه ، أو الأهل اللي ممكن يضغطوا عليها

Anonymous said...

الاول هاقول لربيع الفرق بين العشيقة لرجل متجوز ولا مش متجوز اصلا وبين الزوجة مش مجرد ورقة لا ده الفرق بين الاحترم والشرف وعدم الاحترم والشرف وانا مش جيلكم من علي سجادة الصلاة و لا اني راجل ومحترم ولا حاجة انا عارف نفسي وطالما فيه سكس من غير جواز ابقي مش محترم ولا شريف اصل مابنفعشي ربنايقوله ده حاجة وحشة ومش كويسة واحنا نقول اه بس هنعمله واحنا ناس كويسة ومحترمه والشرف مالوش دعوة بالسكس طبعا ليه زي ماليه علاقة باي حاجة تانية ربنا قالها ماينفعشي ابقي غبي لدرجة اني مش فاهم كده او اكدب علي نفسي
كلامك يا مروة نقسمه تلاتة كاتوجري
مروة فيه حاجات صح ومتفق معاكي فيها انه لازم يعامل مراته كويس زي الطريقة الي بعامل بيها عشيقتة في الحاجات الكويسة ويحترمها ويهتم بيها في كل حاجة ماتغضبششي ربنا
فيه حاجات تانية انا مش معاكي فيها زي ان مش بس في الكلاسس بتاعتنا كمان في باقي المجتمع يعني ماوصلناش لان الجيرل فريند بقي المجمتع بحترمها زي الزوجة او احسن منها حتي بحترمها من الاصل حتي في الهاي كلاس لو وصلوا للكلام ده يبقوا اسوء من العاهرات الي يقبل ويحرتم حاجة زي دي اسوء من الي بيعملها لانه بيدلها شرعية والي بيعملها وهو عارف انها غلط ارحم
الحاجات التالتة سيبك انها محترمة او مش محترمة او صح او مش صح كتير من الاكسمبلس الي ضربتها مروة بتبن انك مش مصر او بتكلمي علي حاجات وناس قليلة فيها مايوه ولابيكني ايه الي الراجل في مصر بيرفض ان مراته تلبسه انتي بتتكلمي عن مين يا ميرو اغلب الرجالة الي في مجتمع بتعمل مشاكل علي جيب ولا جينز ضيق ولا شوية ميك زيادة ولا حتي مجرد شوية روج ولا مش عايزين اصلا ولا حتي تلبس الحجاب و لومحجبة و شوية شعر بينين من تحت الحجاب هتبقي مشكلة ومش هنتكلم عن الريف الي هو اغلب مصر والست نفسها حتي لوكانت من افقر واغلب الناس لو شافت واحده لابسه مايوه هتبصلها باحتقار وعدم احترام يعني كانها فضيحة مش انها هي تلبس مع جوزها او من وراه
حتي جوزها نفسه لما بيرفض حاجات او بطلب حاجات من مراته لانه مهمة عنده لانه بحترمها اكتر من احترامه لعشيقته وحتي الي بالك بالك ده يمكن لانه خايف يسقط ويفقد احترمها ليه وده بيحصل مع ستات كتير ويمكن تكون هي الي خايفه تطلب او تعمل حاجة خوف منه ومن غباءه ممكن بقي تكون صح تكون غلط بس ده فكره او فكرها

Anonymous said...

المشكله مش في انو متجوزها او في انها عشيقه المشكله في اسلوب الزواج الشرقي اساسا غالبا مش بنتجوز الي بنحبهم والي علي قلبنا زي العسل لان الزواج ليه هنا مفهيم تانيه كتير لان لو اي راجل كان صريح مع نفسه واتجوز الي بيحبها فعلا هتكون خفيفه عليه ويعملها معامله العشيقه بس ي اطار شرعي لكن احنا للاسف مش صرحا مع نفسنا سهل نعشق الي بنحبهم فعلا بس مش سهل نتجوزهم

Anonymous said...

لعارفة ليه مش بتجوز الي بيحبها لان عادة مش بيقي حب نضيف لا يبقي فيه حاجات مش شرعية وضمير كل واحد فيهم مش مستريح مش لازم يوصلو لسكس كامل بس كفاية شوية بوس وده لو مرحلة الخطوبة برضه مش مقبول ونقدر نقول انا علاقات اساسه مافهشي حرام بتبقي فيها مشاكل كتير فمابالك علاقات اساسها حرام يمكن ربنا مش بيبارك
من جوه كل واحد فيهم مافيش احترام لنفسه ولا التاني ولو فيه احترام مع التصرفات دي تبقي المشكلة اكبر يعني تبقي عقولهم وقلوبهم اتحجرت يعني عامل زي الي ربنا يبارك له في الحرام ببقي وضعه اسوء حطي عليها اننا متخلطين لاعارفين نمشي شرعي ولا نمشي مع تقاليد فيها الشرعي وفيها الي مش شرعي فيها الكويس وفيها الي مع شوةي تغريب في الحلو والوحش ناش شايفة هتبق يكلاس لما تبقي مودن غربي وناس شايفة ده انحطاط وتخلف وسفالة الخ