مونتيسوري مصر

مشاكل القراء المسجلة

Delivered to your Doorstep

Enter your email address:

Delivered by FeedBurner

Sunday, June 22, 2008

TE DATA - الشركة المصرية لنقل البيانات

من كام سنة كده قررت انى مش هكتم فى قلبى اى حاجة و لا هسمح لحد يضايقنى اصلا ... الصندوق الاسود طفح و مع السن و كتر الضغوط بقى الواحد روحه فى مناخيره و بيتخانق مع دبان وشه

و كالعادة مش هقف سلبية و هتكلم و هصوت على حال البلد اللى مش باين له حال ... ماتخافوش .. انا مش هتكلم فى السياسة و لا فى البنزين و لا العيش ... انا هتكلم فى خدمة العملاء .. ما هو العميل ده مواطن دافع فلوس و له حقوق و اللى يفرط فى حقه زى اللى بيفرط فى عرضه بالظبط

عملت ايه بقى الشركة المصرية لنقل البيانات؟

قال قطعوا الخدمة ... تخيلوا ... انا بدفعلهم فلوس علشان برده ادخل على النت من تليفون البيت

الكرديت كارد عندهم و تفويض انهم يسحبوا الاشتراك الشهرى عندهم و موبايلى عندهم و تليفون البيت عندهم و العنوان و صورة البطاقة عندهم .... يبقى ايه بقى ... يقطعوا الزفت الخط ليه؟

الغلطة الاولى ... قطع الخط على غير حق لان فلوسهم عندهم

الغلطة التانية انهم استخسروا فيا مكالمة تليفون يقولولى فيها ان فى مشكلة ... بلاش تليفون ... يبعتوا رسالة .... بس صحيح هما ليه يتعبوا نفسهم ده انا حيالله عميل ... فى داهية ... ما اتفلق و يولع شغلى

الغلطة الثالثة بقى فى البشر اللى بيردوا على التليفون .... لسان حالهم بيقول: انا مش ناقص قرفك يا عميل ما تستنى للصبح هى الدنيا طارت؟
رد عليا واحد اسمه محمد و قلت له الحكاية قال المبيعات روحوا و ان مش فى ايده يعمل لى حاجة ... قلت له يدينى حد كبير اكلمه ... عملى دكر و قال لى بصوت خشن ... يعنى ايه حد كبير .... قال البيه بيخوفنى!!!!!!!!!!!! قلت له حد عنده صلاحيات (يا شاطر) قام لطعنى على الهولد لحد لما جه البيه التاني

البيه التانى رد عليا بكل ثقة و قاللى انا احمد نيازى .... حكيت الحكاية قاللى المبيعات روحوا و هو مش عارف قطعوا الخدمة ليه و مافيش حاجة ممكن يعملها لى ... قمت اتعصبت و هددت بالكتابة ... تقريبا قاللى و انا مالي

انا دلوقتى مش عارفة ارفع حاجات على السايت بتاعى و مش عارفة احضر للكورس بتاع بكرة لان انت بطئ ... و طبعا مش طايقة ارد على المشاكل بتاعتكم و مش طايقة التبلد و الغباء و التخلف اللى احنا عايشين فيه ده

English version coming up soon!!!!!