مونتيسوري مصر

مشاكل القراء المسجلة

Delivered to your Doorstep

Enter your email address:

Delivered by FeedBurner

Tuesday, December 9, 2008

الى الصحافة المصرية من حقوقى سعودى - المصرى فى غربته

من كام يوم كتبت بوست عن المصرى فى غربته و سمعته و البهدلة اللى بيشوفها. جالى ايميل من عبد العزيز الملحم الذى عرف نفسه كـ حقوقى سعودى و انا استأذنته فى نشر محتويات رسالته و هو وافق. طبعا على النت ممكن اى خد يقول انه اى حد .. لكن انا اخترت انى اعرض عليكم الرسالة و انتم احكموا بنفسكم ... انا مش عندى اى مهلومات عن الاخ عبد العزيز سوى اسمه و الايميل بتاعه
نص الرسالة

الانسه / مروه المحترمه
تأثرت كثيرا بموضوع المصرى بغربته وأنا سعودى وأكن كل حب وأحترام للمصريين فهم أرباب الحضاره شئنا أم أبينا وأنا فى غاية الحزن ومكلوم الى أبعد الحدود عن الحكم التعزيرى بسجن الطبيب المصرى 20 عاما وجلده 1500 جلده ولم نرى بالقرآن أو بالسنه مثل تلك الاحكام المجحفه ولاتيأسى ولاتبتأسى فقد أخذت على نفسى وعدا بمحاربة الفساد والفاسدين وبدأت بشخص يكره المصريين السنه ويعاملهم بأبشع معامله بمنطقة الاحساء الشرقيه وأغلبهم من الشيعه ! والغريب أنهم صفوة المجتمع المصرى وليسوا قاع المجتمع فهم دكاتره وأساتذه كرام جائوا من مصر وقابلهم هذا الحاقد والذى رفضت مصر منحه الماجستير والدكتوراه فأراد أن يرد بقذارته الجميل لامنا مصر فى تعذيب وترويع أبنائها وهم من صفوة بنية المجتمع المصرى وذلك عند التحاقهم بجامعة الملك فيصل بالاحساء بالسعوديه .
ورسالتى هذه ضد / عبد الرحمن البراك المسئول عن تعيين الاساتذه والمدرسين بالجامعه من الجنسين فيقوم بمساومتهم وتحرير عقود مخالفه لما أتفقوا عليه مع الملحقيه الثقافيه بالقاهره وهى بالمناسبه شريكه له أيضا فى كل تلك الجرائم حيث أن تلك الملحقيه الثقافيه والتى لاتحمل تراخيص كأى مكتب للتسفير- وضد قوانين جمهورية مصر - تمنح المتعاقد أو المتعاقده عقدا رسميا ويفاجىء بعقد أقل فى الامكانيات والمرتبات والمخصصات والبدلات عند وصوله المملكه وأن أراد العوده ورفض الامر الواقع وقع عليه الجزاءات ومنها دفع راتب شهرين وثمن تذكرته الذى أتى بها علما بأن هناك جريمه أخرى وهى وجود مكتب تسفير هؤلاء المدرسين والاساتذه بمصر الجديده أمام مستشفى هليوبوليس يتقاضى من كل واحد منهم 20 ألف جنيه يتقاسمها المكتب مع / عبد الرحمن البراك ! والجامعه ومديرها يعلمون بذلك وهى جريمه بحق الشعب المصرى ولاحول ولا قوه الا بالله وان لله راجعون ومرسل لك أحد الرسائل الى خادم الحرمين ضد هذا الجبار المتجبر المتكبر على شعب مصر وتقبلى تحياتنا

الحقوقى / عبد العزيز آل ملحم

ملحوظه : يوجد دكتور وأستاذ جامعى مصرى رفض قبول مبدأ المساومه ويدعى د . أحمد فتعرض لابشع أنواع الذل والاهانه والابتزاز والارهاب الفكرى والمعنوى ولكنه شريحه أخرى من أبناء مصر الاوفياء ورجل بمعنى الكلمه فتصدى له وكأنه فرعون مصر " أحمس " القادم من صعيد مصر لمواجهه هكسوس الجنوب هذه المره بالجزيره العربيه وبرغم عدم أتزان كفتى الميزان ولكن الله ونحن معه ودعواتكم جميعا لنصرته حتى ترفعون ونرفع معكم رؤسنا ردا لجميل أبناء أرض الكنانه التى أوصانا بها رسول الله
نسخة مما ذكر فى الملف مستقل عن عبد الرحمن البراك
صاحب المقام / خادم الحرمين الشريفين
أيماء الى قررات الامانه العامه لمجلس الوزراء ونزولا على الموافقه الساميه لديوان رئاسة مجلس الوزراء وبالاطلاع على الموافقه رقم 8582 بتاريخ 23/5/1406 لمعالى وزير العدل والمشفوعه برأى اللجنه المشكله بأمر معاليه وفى مادتها الاولى فأن الشكوى الماثله شأنها شأن أى شكوى أخرى هى حق مكفول لكل شخص وعلى سمو وزير الداخليه ومعالى وزير العدل مباشرتها وأحالتها الى المحاكم المختصه لتقرير العقوبه التعزيريه وأحالة المدعو / عبد الرحمن البراك رئيس عمادة شؤون هيئة التدريس بجامعة الملك فيصل بالاحساء الى المحاكم المختصه نظرا لقيامه بالعديد من الاخطاء المهنيه والتقصيريه الجسيمه والتى ترقى الى حد الاختلاس وأهدار المال العام أهمها ماقام به وعلى نحو سافر من أهدار أموال الدوله والجامعه على أمور جلل لايقبلها مجتمعنا السعودى بأى حال من الاحوال خاصة الاعمال المصاحبه للاستضافه بالفنادق وأقامة وحضور الحفلات والمهرجنات والمؤتمرات داخل وخارج المملكه ومن ميزانية الدوله مع قيامه بالتكسب من خلال مهام وظيفته وبشتى الطرق مثل المتاجره وبيع تأشيرات هيئة التدريس بالخارج والتى وصلت الى ملايين الريالات وأهمها منحه لنفسه ومعاونيه وأتباعه العديد من بدلات الانتدابات الداخليه والخارجيه بطرق أحتياليه وبغير وجه حق مع تعارضها والتعميم رقم 11400 بتاريخ 14/5/1402 ومابعدها وكذا قررارات مجلس الخدمه المدنيه منذ 1/4/1400 وحتى تاريخه وتفرده دون الاخرين فى أختيار سياراته الممنوحه له من الجامعه مع عدم صلاحيته أصلا للوظيفه المعين عليها وتجاوزه المراتب الوظيفيه المخصصه لها بطرق مريبه نظرا لحداثة عمره وقلة خبرته وأضمحلال أمكانياته الوظيفيه والعلميه والعمليه والتجاوز وعدم التأكد من صحة الشهادات العلميه المقدمه منه كشهادة الدكتوراه المعتوره والمستحصل عليها بطرق أحتياليه من آمريكا عام 2005! والماجستير 2001 من بريطانيا العظمى ! أى بعد عام واحد فقط من أبتعاثه على نفقة الدوله أيضا لتعلم مبادىء اللغه الانجليزيه من مدرسة سانت دياجو بأمريكا لتعليم المعاقين ذهنيا ! والتى لاتساوى حتى ماكتبت به من مداد ! وأفساده للعديد من رؤساء وأعضاء الملحقيات السعوديه بالخارج – بحكم وظيفته - وتهديده لهم وتجنيد العديد منهم لارسال رسائل وشكاوى كيديه ضد المتعاقدين من أعضاء هيئة التدريس والقادمين من بلادهم للرضوخ لطلباته خاصة مع السيدات منهن وهو صدامى السلوك مع أقتران ذلك بعنف وسلوك عدوانى مريض لاتخطئه العين ومجاملته للعديد من أعضاء هيئة التدريس السعوديون على حساب الامن القومى للمملكه العربيه السعوديه كتعيين أصحاب الفكر الممجوج وأعضاء الجماعات الاصوليه والسلفيه ذات الفكر السياسى الرافض لسياسة المملكه بالجامعه وهم المحيطين به حيث يعدون بطانته مع تعضيده لهم والسكوت عليهم وأخفاء نشاطهم الهدام أمثال / أبراهيم الحواس وغيره ممن يدينون بالولاء لبن لادن والقاعده وممن تذخر السجون والمعتقلات باشقاءهم واقاربهم وكذا ببعض العناصر المتطرفه والبؤر الساكنه الخطره بكل من كليات التربيه والزراعه الخ وعمداء الهيئات الاداريه والاكاديميه بالجامعه متجاهلا كافة الاوامر والتعاميم السريه وغير السريه الامنيه الصادره بهذا الخصوص كما أن هناك العديد من المخالفات والتى ترقى الى حد السقوط فى العديد من جرائم السطو على المال العام وتخريب مرفق تعليمى وثقافى كبير وتعطيل مسيرة جامعة الملك فيصل لاكثر من عشرون عاما والتربح من خلال مهام الوظيفه وأرتكاب أخطاء مهنيه وتقصيريه وأمنيه كبيره كما أن هناك العديد من أتباع وأمثال / عبد الرحمن البراك خاصة وأن للجامعه فروع داخليه وخارجيه عديده الى جانب السقوط فى أهدار كرامة وكبرياء وسمعة الجامعه والدوله بكافة الوسائل والصور لدرجة وجود قصور للاقامه والضيافه داخل حرم الجامعه ! وميزانيه تكلف خزينة الدوله مئات المليارات من الريالات ! وهى سابقه خطيره لم تشهدها أى من الجامعات بالعالم أجمع و لو أن ذلك حدث ببلد كالصين لقطعوا السنتهم وأيديهم وسلخوا جلودهم والقوهم للكلاب تنهشهم بميدان النصر الشهير بقلب " بكين" ولو طبقت عليهم الشريعه الاسلاميه لقطعوا أيديهم وأرجلهم من خلاف كما جاء بالقرآن وسحلوهم بعد نفيهم وسجنهم ولن يبقى الله عليهم طويلا فأمثالهم لايبقى لهم الا القبر أو عذاب الضمير فالناس صنفان أحياء وهم موتى على الارض وآخرين وهم موتى ولكن فى بطن الارض أحياء . والسلام عليكم ورحمة الله وبركاته والله من وراء القصد ,,,,,,
عبد العزيز آل ملحم
Abdulaziz_almolhem@yahoo.com
الايميل الثانى و الموافقة بالنشر
الاخت / مروى
السلام عليكم ورحمة الله وبركاته
أنا لاأمانع فى نشرها ونشر أسمى وأتركيها مع رسالتى الحاليه أيضا كتعليق على مدونتك الرائعه الراقيه ولكن أرجو أن تتصلى أيضا بمجتمعات الحقوقين كما نفعل ومنظمات حقوق الانسان والفضائيات المصريه والاجنبيه حتى يعلم القاصى قبل الدانى أن بلاد ومجتمعات الجزيره والعرعر والجرجير لايمكن أن تتساوى هامتها مع هامة بلاد الحضاره وحتى تكتمل الفائده ودعوتكم لعودة المصريين الشرفاء من بلاد الجهل والتطرف " الجاهليه الثانيه " سيرفع من قدرهم عندنا وسيذداد راتبهم أضعاف مضاعفه وهذا ماقام به الدكتور المصرى وأستاذ اللغه الانجليزيه الذى كلمتك عنه والذى يلاقى الامرين من عصابة جامعة فيصل على يد الجلاد القواد / عبد الرحمن محمد البراك علما بأن فيصل منهم براء
هذا وقد رفض الدكتور والاستاذ الجامعى العمل معهم وبعد أن كان الامر هو موضع المساومه على الراتب وخفضه أصبح الان الموضوع هو ذيادة راتبه ورفضه العمل أساسا معهم لعدم أحترامهم العقد الاصلى بالقاهره وطلب العوده ورفض مضاعفة راتبه وهو نسيج خاص وواعد من البشر ومن المصريين لم نقابله للاسف منذ زمن / عبد الناصر حيث كان المصرى يعامل بأحترام ويحصل على أعلى الرواتب وليس أقلها كما يحدث الان والغريب هو هذا التعتيم الاعلامى على موضوعه وحتى لاتنكشف خيبة وزارة الخارجيه والقوى العامله المتواطئه مع الجلاد السعودى للاسف أما جلد الطبيب 1500 جلده فهذا مخالف للدين والشرع والعرف والقوانين الوضعيه بالعالم المتحضر أو حتى المتخلف على حد سواء
أنشريها بارك الله لك ياحاملة لواء الحق والعدل والحريه وليتنا نملك نصف جرأتك فقد كسروا عظامنا لاسامحهم الله
عبد العزيز آل ملحم
الايميل التالت بتأكيد النشر
السلام عليكم ورحمة الله وبركاته
أشاره الى بريدكم لى بخصوص عدم الممانعه فى نشر رسالتى لكم أو نشر أسمى أو وضعها للنشر كتعليق على المدونه وعلى قائمة الاوليات أود أعلامكم بأنه قد سبق لى أرسال موافقتى على ذلك ولن أكف عن مناشدة الفضائيات ومنظمات حقوق الانسان حتى يحصل الانسان أى كان جنسيته وليس المصرى بصفه خاصه على حقوقه الادميه والانسانيه فى بلاد العرعر والجرجير والجاهلية الاولى التى جاء ذكرها بالقرآن وذلك بلا جلد أو سجن أو أعتقال وهذا عهدا أمام الله ماحييت وشكرا لاستجابتكم الانسانيه السريعه علما بأن ترتيب عودة المصريين أو غيرهم من السعوديه والدعوه من منبركم الشريف الى ذلك سيؤدى الى زيادة مرتباتهم وكثرة أحترامهم من الجانب الجاهلى السعودى وهى منظومه تخضع لعوامل العرض والطلب وينبغى أن يعرفها القائمين على الخارجيه المصريه والقوى العامله حتى تذداد أسهم وقيمه المصرى بالخارج والداخل علما بأن الاستاذ والدكتور المصرى والذى تم التحرش والاسائه له وعدم صرف مستحقاته الماليه منذ شهور يرفض وبأباء وكرامه وكبرياء عالى عرضا بمضاعفة راتبه ويصر على الرفض بعد الاساءه والتهديد له وعائلته على نحو قمىء كما يصر على العوده ومقاضاتهم وطلب التعويض المناسب لما أصابه من أضرار علما بأنه لاالمستشار العمالى أو الثقافى المصرى بالمملكه السعوديه ولا حتى السفاره أو القنصليه قد تحركت من أساسه ولو على أستحياء لحفظ ماء وجهها وتركت الاستاذ المصرى يصارع وحده أبشع أنواع العنصريه والجاهليه كما جاء وصفها تماما تماما بالكتاب ............. وحفظكم الله
عبد العزيز آل ملحم

Sunday, December 7, 2008

الشوتايم و العميل الملطشة

حكايتى مع الشوتايم

فى يوم كنت مزنوقة على كبرى 6 اكتوبر من كام سنة و رفعت راسى للسما و اتنهدت و وانا منزلة راسى تانى لقيت اعلان للشوتايم و فى الاعلان رقم مختصر للاشتراك

اتصلت
ردت عليا نرمين و قالت لى انت سمعتى عننا ازاى حكيت لها الموقف زى ما هو .. قالت لى طيب اقفلى حضرتك و انا هتصل بيكى

طبعا بداية مبشرة ... الناس خايفة على فلوسى

كل شئ تم فى يومين و كله تمام و اخدوا رقم كارت سيتى بانك و الدنيا مشيت سنين و سنين الى ان

سيتى بانك قرروا ان انا معرضة للنصب و الاحتيال و كاجراء امنى لازم يغيروا الكارت بتاعى و فعلا خلال كام يوم كان الكارت الجديد عندى

شوتايم حاولوا يسحبوا مبلغ الاشتراك الشهرى ماعرفوش ... بعتوا لى رسالة .. وبعدين قطعوا الخدمة و انا طنشت .. انا لا بقعد فى البيت و لا فارق معايا

وبعدين هايدى كلمتنى فى نص نوفمبر و ابتديت رحلة العذاب

حكيت لهايدى الحكاية و هى قالت لى مش مشكلة .. ابعتى لنا البيانات الجديدة على الايميل

قلت لها هايل

قالت لى و معها ابعتى صورة من الكارت

مش هايل
شرحت لها ان انا مواطن عادى لا عندى فاكس و لا سكانر و لا كاميرا ديجيتال و الموبايل مافيهوش كاميرا

قالت لى لازم الصورة قلت لها مش لاعبة ... و اتعصبت ... و عندت .. احنا خلاص فهمنا انى عنيدة و دماغى ناشفة

و بعدين جالى برد و قعدة البيت عايزة شوتايم ... فرحت قوى لما من كام يوم نرمين كلمتنى .. ايوه نرمين بتاعت زمان اللى عملت لى الاشتراك من سنين و كانت لطيفة للغاية و اشتكيت لها من التعقيدات .. قالت لى مش مشكلة ... انا هابعت لك فى رسالة على الموبايل الايميل اللى تبعتى عليه البيانات و مش مهم الصورة ... و فعلا
mceops@cne.com.eg

بعت البيانات و جالى اخطار ان الرسالة وصل و اتفتحت و استنيت ... الخدمة لسة مقطوعة

كلمت نرمين ... قالت لى اتصلى برقم 38279300
وهما هيشغلوا الخدمة و انت معهم على التليفون

رد عليا واحد نسيت اكتب اسمه و كان شكله مش فاهم انا بقول ايه
راح محولنى على ياسر و ياسر كان مثال الموظف القتم القرفان لكن انا قلت خليكى لطيفة علشان الخدمة ترجع ... اديت ياسر رقم الاشتراك و كان شكله لا فاهم و لا بيكتب ورايا و لا باصص فى شاشة
وقلت لياسر ان انا عندى برد و زهقانة و هو وعدنى ان الخدمة هترجع كمان ساعتين

و قعدت ... و الخدمة لسة مقطوعة
كبرت فى دماغى
اتصلت تانى النهاردة كمحاولة اخيرة قبل ماتعصب
رد عليا واحد مالحقتش اكتب اسمه لكن فاجئنى ان الرقم ده .. اللى نرمين ادتهولى و اللى ياسر رد عليا فيه رقم الاشتراكات الدوليه

طيب نرمين و غلطت ... عادى
لكن ياسر اشتغلنى .... ياسر اشتغلنى

المهم اخدت الرقم الصح 38276666
و اتصلت
ردت عليا مروة يوسف
هى لا تعرف مين نرمين و لا بأى صفة قالت لى مش مهم الصورة و لا مين ياسر و لا اى حاجة غير مكالمة هايدى

و اصرت مروة على صورة الكارت و انا ركبت دماغى اكتر
قالت لى روحى اقرب فرع ... و انتم عارفين فوبيا اقرب فرع اللى عندى

مروة كانت زوق و صوتها كانت فعلا بتحاول تحل المشكلة لكن التعقيدات و سياسة الشركة و ياسر هما سبب النوت ده

المهم ... اوربيت و لا أرت؟ ولا دريم بوكس؟
أصل الاختيارات كتير و العميل دايما كسبان

المصرى فى غربته

الايميل ده جالى النهاردة و انا عارفة ان فى ظل حكاية الاطباء المصريين و جلدهم و سجنهم فى السعودية الموضوع هيبقى مش لطيف فأنا هـ عرض الرسالة و بعدين ردى و مستنيا تعليقاتكم


الرسالة
--------------------

مروه ازيك عامله ايه
انشاللهخ تكوننين بخير وكل سنة وانتى طيبة
مروه رجاءاا انا عايزك تفتحى النارررر على موضوع الناس المسافرين فى الدول العربية
وعلى الظلم والاهانة ال بيتعملوا بيها
انا مش بتكللم عليهم كلهم لكن بنسبة 80%
يعنى الواحد بيطلع من مصر سواء كان مصرى ولا صعيدى لو مصرى يبقى ابوه او امه باعوا ال وراهم وال قدامهم عشان يدفعوا حق الاقامة ال وصل سعرها دلوقت 25000الف ج
وبيروح على اساس انه هيقيبض مرتب محترم وهيتعامل معاملة كويسه وبيبقى مكتوب فى عقد العمل حجات
كتيررر بيتفاجىء بعد ما يسافر بأمور جديدة طبعا الفاس وقع فى الراس بيضطر ينفذ اى حاجه بيقول عليها الكفيل بدون اعتراض مثلا انا اعرف بعض الشخصيات بيششتغلوا 3 شغلانات فى نفس المكان بنفس الراتب بدون اوفر تايم او اى زيادة فى المرتب بل بيدفعوا حق التأمين الصحى والطوابع عشان الاقامة ياريت تطرحى الموضوع ده
ومعظم المتغربييين مش راضين عن نفسهم ولما تسألى السبب يقولللك بلدنا عايزه كده هى ال مرخصانا لان المدير كل ما نطلب منه الزياده يقولنا لو مش عجبكوا امشوا واجيب 10مصرييين بدلكوا
وحسبى الله ونعم الوكيل

الرد
------------------------


بص يا احمد .. انا بصراحة ضد ان المصرى يسيب بلده و يتغرب الا اذا جاله عرض محترم و الناس باست ايديه و رجليه علشان يمن عليهم و يشتغل عندهم و طبعا ده مش هيحصل الا اذا كان كفاءة و الكفاءة بتيجى مع المجهود و التطوير و العمل و العمل مش بالفهلوة و الفكاكة و الحنجلة

علمائنا متشالين على الرؤوس برة علشان عندهم حاجة يقدموها و اللى بيسافر برة و يشتغل بجد و يطور نفسه برده بيرقى و بيعيش محترم

لكن المصرى الكسول المتواكل الكذاب الدحلاب الخايب هـ يتداس بالجزمة لانه جابه لنفسه ... المصرى اللى بيجرى ورا القرش هيتذل بيه و ليهم حق يعملوا فيهم اكتر من كدة

اللى رخص المصرى المصرى اللى زيه و هو نفسه لما بقى عبد لكل من دفع سحتوت اكتر .... انا اعرف ناس سافرت و تعبت و شقيت و كرامتها متصانة .. اصل العفة و الكرامة دى حاجات مالهاش صلة بالغنى و الفقر و اعرف ناس تانية بتتهزأ كل ساعة و ساكتة علشان القرش .... العيب فى مين بقى؟

نصر و ايهاب مصطفى - فودافون

لأ مـ تقلقوش ... مش خناقة زى كل مرة ... أنا زى ما بـ اكتب الاخبار المنيلة بـ اكتب برده عن الحاجات المشرفة

نصر و ايهاب مصطفى فى فودافون يستاهلوا النوت ده

الحكاية ان عمى جاب لى بلاك بيرى هدية فى يناير اللى فات و بما ان انا عندى فوبيا التكنولوجيا فضلت ركناه فى الدولاب خايفة منه لحد ما تليفونى الاصيل بعد اربع سنين معاناه معايا باظ و بما ان انا عيانة و مش عارفة اتصرف فى اى حاجة بقالى اسبوع اضطريت افتح الدولاب و اواجه البلاك بيرى

مش هـ دخلكم فى تفاصيل التعارف و الذى منه لكن بعد يومين اكتشفت انا الناس اللى بتبعت لى خرفان بتلعب فى العيد بعتت لى طلاسم. مكالمة خدمة العملاء لأى شركة بقت عاملة عندى زى زيارة الدكتور ... و طبعا انا متحفزة خلقة

المهم اتصلت و رد عليا نصر ... قولت له بص يا نصر انا عايزاك تصبر عليا قال لى حاضر بابتسامة بانت فى التليفون و ابتديت احكي له حكاية الخرفان و حكاية الانترنت و حكاية اللايف و باقى الخدمات بتاعة البلاك بيرى

نصر سمع بتركيز و حاول يساعدنى و بعدين قال لى انه هـ يجيب حد عنده نفس الموديل بتاعى علشان العيب عندى فى الجهاز مش عندهم فى الخدمة. انا قلبى وقع .. اكتر حاجة كنت خايفة منها انه يقول لى خدى الجهاز و روحى اى فرع قريب ... انا بكره المشاوير دى

دقايق و رد عليا ايهاب مصطفى ... لسة هـ احكى له قال ان نصر فهمه و انه معاه الجهاز بتاعه و هـ يمشى معايا خطوة خطوة ... ابتدينا ... و طبعا انا رمز العميل الغبى العنيد اللى عامل فاهم

المهم ايهاب قال لى ان ممكن المكالمة تقطع و احنا بنحاول نظبط السوفت وير ... قلت اه هيقول روحى الفرع و بدأت اتحفز ... لقيته بيقول لو عندك رقم تانى اديهولى و انا هـ اكلمك عليه .. قلت بيخلع و مش هلاقيه تانى .... علشان كدة عرفت اسمه بالكامل

قفلت و انا مش بايدى حيلة ... لقيبه فعلا كلمنى و قعد معايا على الخط 33 دقيقة بيحاول يشغل الخدمات ... و استحمل اسئلتى و الفتى و الشك و الزراير الغلط اللى دوست عليها و فى النهاية اشتغل الجهاز و الخدمات و هو لسة صابر و مبتسم .... برافو ... انا فعلا مبسوطة انا متأكدة ان الشابين دول هـيترقوا و ينجحوا لو فضلوا بالحماس و التفانى ده

مش زى الشوتايم ... دى حكاية تانية هـ احكيها لكم بعدين بلا خيبة

ابعتولى صور الخرفان بقى
:)

كيف يتطور الخلاف بين الرجل و المرأة؟



الفصل الثالث من كتاب د. هبة ياسين - اكتشف نصفك الاخر

1) مرحلة الكمون: حيث تولد المشكله و تكون موجوده بالفعل , لكن دون ادراك الطرفين لها, أو حتى مع ادراكهما لها, لكن دون ادراكهما لعواقبها و تأثيرها على حياتهما بعد, أو ربما محاولة منهما أو من أحدهما للتغاضي عن المشكله اعتقادا" منه أو منهما أنها ستمر بمرور الوقت.

2) مرحلة الاستثاره : حيث يبدأ تكرار المشكله في حث الزوجين على ابداء التضرر, أو تبدأ عواقب و آثار هذه المشكله في فرض نفسها على الحياه الزوجيه, و حينها يدرك الزوجين أن هذه المشكله موجوده بالفعل و تحتاج الى حل, و أنها لن تختفي من تلقاء نفسها كما اعتقدا من قبل.

3) الاصطدام: حيث يبدأ الطرفين بالمواجهه, التي غالبا" لا تكون مواجهه فعاله لأنها تتسم و خاصة" في أول الزواج بسمات الشجار و النزاع أكثر من اتسامها بسمات النقاش و الحوار.

4) انتشار النزاع: حيث ينتشر الخلاف من نقطه واحده الى عدة نقاط و عدة نواحي بحيث يسود جو النزاع بصفه عامه.

5) انهاء المشكله أو الزواج: و في هذه المرحله ينقسم الأزواج الى فريقين, الأول منهما يدرك حجم المشكله و يسعى الى تقليصها أو حلها من جذورها, و الفريق الآخر يعجز عن ذلك , أو يشعره جو النزاع و الخلاف بعدم الرغبه في انهاء المشكله, و يسعى في هذه الحاله الى انهاء الزواج ككل,غالقا" بذلك كل باب للمشاكل.


أما عن كيفية حدوث الأنفصال

1)المرحله الأولى : و هي مرحلة النقد الدائم, و لا يقصد هنا النقد بصفه عامه,و لكن يقصد به النقد المدمر اللاذع الذي ينتقد فيه الشخص الآخر و ليس سلوكه, و دون هواده أو شفقه , مما يجعل الآخر يضج بكم التهم المنسوبه اليه دون محاولة اصلاحها, و ربما يلجأ الى العند انتقاما" من الطرف الآخر, و تلك هي علامة التحذير رقم 1 التي تدل على أن العلاقه تسير في الاتجاه الخاطئ.
و في العلاقه الصحيحه بين الزوجين تكون امكانية التعبير عن الشكوى مكفوله, و بحريه تامه, لكن دون توجيه نقد لاذع, في حين أنه في حالة النقد الهدام لا يكون النقد محددا", كما لا يقدم فيه الناقد حلا".

2) المرحله الثانيه: مرحلة التفسير السلبي, و تعني سوء الظن بكل تصرفات الآخر, مما يؤدي الى سيطرة الأفكار المسمومه على العلاقه, فيحاول الشخص دائما" تفسير و فهم كل ما يفعله الآخر على محمل خاطئ و دون التماس أي عذر له.
و من الآثار الجانبيه للأفكار المسمومه هذه الأعراض العضويه التي قد يعاني منها بعض الأزواج دون أن يفطنوا الى سببها الحقيقي, و منها:
آلام الرأس و الرقبه, الصداع المزمن, آلام الظهر, قرحة المعده, الاكتئاب, القلق و الأرق, الوهن و قلة النشاط, التشوش و شدة الانفعال.
و كتطور طبيعي لهذه المرحله تتولد مشاعر الرغبه في الانتقام و الأخذ بالثأر كرد فعل لدى الطرف الآخر.

3) المرحله الثالثه: مرحلة التحقير و السخريه, ففي هذه المرحله يبدأ الشخص في الاستهزاء بالآخر و السخريه منه, و تحقير كل ما يقوم به, و هي مرحلة هجوم على الشخص نفسه و ليس ضد أفعاله.

4) المرحله الرابعه: مرحلة تصعيد الخلافات, حيث تأخذ دائما" الخلافات حجما" أكبر من حجمها, و تصبح أي مشكله مهما كانت بسيطه و صغيره مشكله كبيره , و يستحيل علاج كل مشكله, مما يؤدي الى أن يصبح كل طرف في حالة دفاع مستمر أو حتى في حالة هجوم مضاد.

5) المرحله الخامسه: مرحلة الانسحاب السلبي, و الذي يتراوح ما بين انسحاب جزئي جسدي الى انسحاب كلي نفسي و جسدي, و يتمثل ذلك في الهروب الدائم من أي نقاش, و تجنب العراك, و تجميد أي حوار, و يعتبر هذا الأخير من أقصى صور الدفاع السلبي, اذ يوجه فيه الطرف المجمد رسالة تباعد و تعالي و نفور و اشمئزاز من الطرف الآخر.
و في هذه المرحله يقع أحد الأمرين, اما الانفصال و الطلاق المعلن, أو الطلاق الصامت الذي يحياه الكثير من الأزواج, كأسلوب من أساليب الحفاظ على المظهر الاجتماعي, أو ربما لضرورة ما مثل تربية الأولاد , أو حتى لضروريات ماديه.

و من هنا يتضح جليا" أنه لللأسف حتى مع استمرار الزواج فهذا ليس مؤشرا" على نجاحه و توفيقه, فهناك نسبه لا بأس بها من الزيجات المستمره يجدر بنا اضافتها الى عداد المطلقين.

و من الجدير بالذكر أن 75% ممن يلجأون الى تجميد الحوار هم من الرجال, رغم أنه و لسخرية القدر المرأه في قمة غضبها و ثورتها لا تحتاج الا الى الحوار و التواصل الفعال.

و من هنا نخلص الى أن فقد الحوار و عزلة كل من الطرفين عن الآخر هي بداية النهايه, و ان كان النقد الهدام هو أول علامات أنك ضللت الطريق, فان فقد الحوار و انتهاء الكلمات هو آخر هذه العلامات, بعدها أنت أمام مفترق الطرق, اما التفكير في الاصلاح جديا", و اما الأفتراق نهائيا".