مونتيسوري مصر

مشاكل القراء المسجلة

Delivered to your Doorstep

Enter your email address:

Delivered by FeedBurner

Sunday, December 7, 2008

نصر و ايهاب مصطفى - فودافون

لأ مـ تقلقوش ... مش خناقة زى كل مرة ... أنا زى ما بـ اكتب الاخبار المنيلة بـ اكتب برده عن الحاجات المشرفة

نصر و ايهاب مصطفى فى فودافون يستاهلوا النوت ده

الحكاية ان عمى جاب لى بلاك بيرى هدية فى يناير اللى فات و بما ان انا عندى فوبيا التكنولوجيا فضلت ركناه فى الدولاب خايفة منه لحد ما تليفونى الاصيل بعد اربع سنين معاناه معايا باظ و بما ان انا عيانة و مش عارفة اتصرف فى اى حاجة بقالى اسبوع اضطريت افتح الدولاب و اواجه البلاك بيرى

مش هـ دخلكم فى تفاصيل التعارف و الذى منه لكن بعد يومين اكتشفت انا الناس اللى بتبعت لى خرفان بتلعب فى العيد بعتت لى طلاسم. مكالمة خدمة العملاء لأى شركة بقت عاملة عندى زى زيارة الدكتور ... و طبعا انا متحفزة خلقة

المهم اتصلت و رد عليا نصر ... قولت له بص يا نصر انا عايزاك تصبر عليا قال لى حاضر بابتسامة بانت فى التليفون و ابتديت احكي له حكاية الخرفان و حكاية الانترنت و حكاية اللايف و باقى الخدمات بتاعة البلاك بيرى

نصر سمع بتركيز و حاول يساعدنى و بعدين قال لى انه هـ يجيب حد عنده نفس الموديل بتاعى علشان العيب عندى فى الجهاز مش عندهم فى الخدمة. انا قلبى وقع .. اكتر حاجة كنت خايفة منها انه يقول لى خدى الجهاز و روحى اى فرع قريب ... انا بكره المشاوير دى

دقايق و رد عليا ايهاب مصطفى ... لسة هـ احكى له قال ان نصر فهمه و انه معاه الجهاز بتاعه و هـ يمشى معايا خطوة خطوة ... ابتدينا ... و طبعا انا رمز العميل الغبى العنيد اللى عامل فاهم

المهم ايهاب قال لى ان ممكن المكالمة تقطع و احنا بنحاول نظبط السوفت وير ... قلت اه هيقول روحى الفرع و بدأت اتحفز ... لقيته بيقول لو عندك رقم تانى اديهولى و انا هـ اكلمك عليه .. قلت بيخلع و مش هلاقيه تانى .... علشان كدة عرفت اسمه بالكامل

قفلت و انا مش بايدى حيلة ... لقيبه فعلا كلمنى و قعد معايا على الخط 33 دقيقة بيحاول يشغل الخدمات ... و استحمل اسئلتى و الفتى و الشك و الزراير الغلط اللى دوست عليها و فى النهاية اشتغل الجهاز و الخدمات و هو لسة صابر و مبتسم .... برافو ... انا فعلا مبسوطة انا متأكدة ان الشابين دول هـيترقوا و ينجحوا لو فضلوا بالحماس و التفانى ده

مش زى الشوتايم ... دى حكاية تانية هـ احكيها لكم بعدين بلا خيبة

ابعتولى صور الخرفان بقى
:)

4 comments:

An Egyptian said...

مش عاوز ابقى غتت و متشائم بس فى الغالب هما كانوا متعاونين و ظراف و لطاف كده لانك مزة يعنى لو انتي راجل كانوا فى الغالب قفلوا فى وشه

ثانيا فى الغالب برضو تلاقيكي عرفتيهم بنفسك و هما عرفوكي و طبعا مش هايستندلوا مع شخصية عامة زيك.

لو كل الموظفين بيترقوا عشان لطاف مع المزز كان زماننا بلد النوابغ

jessyz said...

Vodafone really do have great customer service and they always try their best to help you fix your problems every time. I've had so many problems and every time they would help me and always with a smile. :-( unfortunately ma3andish 5erfan ab3athalek.

Team said...

بالنسبة لرأيى فى الموضوع فأنا مع اللى رد الأول انه لو واحد راجل اللى بيكلمهم بكل صراحة كانو قفلو فى وشه مع تانى سؤال, احنا عندنا الموضوع ده فى بلدنا بنخلط بين العمل والميل الطبيعى للجنس الأخر, وأكيد أنتى بردو معايا فى الرأى ده
حاجة تانية بقى مهمة عايز أكلمك فيها..انا بتكلم بالنيابة عن فريق شباب من كلية الأداب جامعة القاهرة عملنا مسابقة أدبية وتطوعنا بجوايز مالية للمسابقة, فكنا عايزينك تشوفى موقع المسابقة وتكتبى بوست عن رأيك فيها سواء بالسلب أو الإيجاب, لأن يسعدنا نعرف ان حد بيكتب وحساس زيك بيشترك برأيه معانا ويدعم المسابقة اللى عايزنها توصل لكل مصر
الموقع هو
http://EgyptWrite.com
هنستنى ان شاء الله ومتابعين البوستس بتاعتك على feed burner
شكرا وكل عيدوأنتى طيبة :)

Anonymous said...

وماذا تنتظرون ؟؟؟؟؟؟؟؟؟؟؟

فالجريمه ضد أساتذة مصر الجامعيين جريمه كامله وبأعتراف السعوديين أنفسهم ؟
فماذا تنتظرون ياأولى الالباب؟
الم يكفيكم كلاما طوال الخمسون عاما الماضيه ؟
تحركوا الان وأنقلوا للخارجيه المصريه ومجلس الوزراء ووزارة القوى العامله تلك الشكاوى ولاتنتظروا أن يقوموا هم بأنفسهم بمشقة الاتصال بكم أو حتى قرأة مقالتكم التى تذهب أدراج الرياح
أفيقوا ياأصحاب البلوجات وياأصحاب الياقات البيضاء والزرقاء ! وأخاطبكم جميعا أفيقوا واأفعلوا شيئا لكرامتكم وكرامة كل مصرى !!!! الا تخجلون من قيام سعودى بالشكوى نيابة عنكم لحماية صفوة مجتماعتكم بالخارج ؟
هل تنتظرون قدومه وهو مقيد الحريه ومقيد الفم واللسان هناك وربما كان معتقلا بسبب جرأته غير المعهوده ! هل تنتظرون منه الحضور لمصر ومقابلة النائب العام بدلا منكم ؟ يالها من فضيحه !!!! آلا تخجلون !! أما أنت أيها الحقوقى الشجاع فلك منى كل الحب والتقدير
منى الشاذلى
قناة دريم الفضائيه