أيوة
وائل عباس زفت و قطران
و لسانة طويل
و قليل الأدب
و ألفاظه تخدش الحياء
و بيشتم كل من هب و دب
قلت لكم زفت و قطران
من حقك ترفض اسلوبه
من حقك تستتقل دمه
من حقك تشمئز منه هو شخصيا
من حقك ما تقرالهوش حاجة
من حقك ما تتابعش مدونته و لا على تتابعه على الفيسبوك أو تويتر
لانه زفت و قطران
لكن مش من حقك تشمت فيه لما يتهجم عليه فرد أمن فى بيته و يتخانق معاه على وصلة النت و يكسر له سنانه
مش من حقك تستهون بمعاملة الارهابيين اللى بيتعاملها كل مرة و هو داخل او خارج من البلد
مش من حقك تعمل ودن من طين و ودن من عجين لما يرجع من مؤتمر فى لبنان يلاقى البوليس اقتحم بيته و ارهب امه و ابوه و طلع اذن بالقبض عليه لتنفيذ حكم سجن غيابى بست اشهر فى قضية متلفقة
مش من حقك تنسى انك مش بتدافع عن اصحابك و حبايبك على مدونتك و لا جريدتك و لا اى كان منبرك
انت بتدافع عن اى مصرى كرامته او حرمة بيته انتهكت
و بتساند اى مواطن اتعامل معاملة الكلاب فى الداخلة و الخارجة
لانك يوم لما تسكت على حق فلان و كرامة علان علشان مش عاجبينك
بكرة هييجى الدور عليك و هتعرف ان الحق و العدل و حقوق الانسان ما فيهاش خيار و فقوس
2 comments:
ياريت كمان تدافعى عن حقوق اللى بيشتمهم وبيتعرضوا لرزالاته وبذاءاته واللى اكيد من حقهم يشمتوافيه لما هو كمان يتهان ويحصل له اللى بتحكى عنه لان ده شكل من اشكال العداله
للاسف احنا احيانا بنخلط بين الحقوق والاشخاص ومشاعرنا نحوهم
الحق مطلق والدفاع عن الحق قيمة مطلقة لا جدال فيها ولا اهواء شخصية
Post a Comment