مونتيسوري مصر

مشاكل القراء المسجلة

Delivered to your Doorstep

Enter your email address:

Delivered by FeedBurner

Thursday, April 10, 2008

حبيبتى مصر

انا بكتبلك بالعربى اهوه علشان مش يبقى عندك حجة ... طبعا انتى مستغربة انا عايزة منك ايه و انا اللى عمرى ما كتبتلك و لا كتبت عنك ... شوفى يا ستى ... من الآخر كده حالك مش عاجبنى و انا زعلانة عليكى. انا مش قصدى انقدك و لا أضايقك بكلامى ده ... أنا بس عايزة أقولك كلام كتير من قلبى علشان انا فعلا بحبك و بتمنى لك كل خير. انتى فاكرة زمان لما بابا كان عنده بعثة فى أمريكا و كلنا سافرنا معاه؟ ايوه ... لما قعدنا 9 شهور ... المدرسة هناك كانت احلى من مدرستى هنا و بيتنا هناك كان أحلى من بيتنا هنا و الاكل هناك كان احلى من الاكل هنا و كنت فى الأول مش حافظة النشيد الوطنى بتاعهم لكن مع الوقت حفظته و حبيته ... لما التسع شهور خلصوا انا زعلت انى راجعة مصر و قعدت اعيط كتير و كنت عايزة اهرب من البيت ... انا مش كان ليا حاجة فى مصر أصلا أرجع علشانها

لما رجعت كنت مش فاهمه حاجة فى المدرسة ... كنت خايبة فى العربى و فى التاريخ و فى الجغرافية و التربيه الاجتماعية و المدرسين كان شكلهم مبهدل و كانت ريحتهم مش قد كدة الا ميس ميرفت بتاعة الانجليزى و ميس سميحة بتاعة الفرنساوى. و وحشتنى الجنينة الصغيرة اللى كانت قدام بيتنا ... أنا كنت مش بحبك يا مصر و فضلت مش بحبك سنين كتير و كرهتك أوى فى ثانوية عامة و حسيت أنك حرمتينى من حلم انى أكون طبيبة علشان قال ايه ... المجموع! و دخلت الجامعة و برده مش كنت بحبك لأنك السبب ان بابا سابنا و رجع أمريكا علشان الأبحاث و الدراسة و العلم. ماما كانت زعلانة أوى و فضلت لابسة دبلة و لما سألتها ليه .. قالت لى ان مصر مش بتحب المطلقات ... و لما أنا كبرت شويه حسيت ان مصر مش بتحب الستات أصلا

انا مش فاكرة انا امتى حبيتك يا بلدى ... بس أنا فاكرة كويس أول مره سافرت لوحدى شعرى كان بيقع و كنت ساعات بعييط من غير سبب ... هما كانوا عشر أيام عمى بس انا حسيت انى مش قادرة اتنفس و أول لما ركبت الطيارة كنت عايزة أغمض و انام علشان الوقت يعدى و أرجع تانى ... أنا مش عرفت انام ... أنا قعدت أبص فى الساعة كل شوية لحد لما الطيار قال ان احنا قربنا ننزل مطار القاهرة ... زى العبيطة دموعى نزلت و حاولت امسك نفسى ابتديت اتشحتف ... انا كنت مكسوفة أوى من شكلى قدام الركاب فعملت نفسى عندى مغص و علشان كدة بعيط و المضيفة جابت لى ساندويتش جبنة و اتلهيت فيه

انا كرهت المطار ... المطار اللى ودعت فيه بابا و المطار اللى كل ما ادخله احس انى عايزة اعيط ... انا دلوقتى بقى مش بحب السفر أصلا. أنا بحب بيتى أوى و بحب قططتى ... و أصحابى و مش كل عائلتى ... مش انا كده ابقى بحبك يا بلدى؟ مش مهم الزحمة و التراب اللى عملى حساسية فى وجهى ... مش مهم المصالح الحكوميه و الناس اللى فيها اللى بيفكرونى بالمدرسين اللى ريحيتهم وحشة و لبسهم مش حلو ... مش مهم مشاكل الستات و الرجالة اللى انت السبب فيها و اللى انا غرقانة فيها ... ايوه طبعا السبب فيها ... مش انت اللى بتخلى الستات تتحجب و انت برده اللى بترفضى انهم يظهروا فى التليفزيون أو يشتغلوا فى الشركات الكبيرة؟ مش انت برده اللى بتخلى الست مكسورة و تحت رحمة رجالة مش ليهم صلة بالرجولة غير أعضائهم التناسليه؟ مش انت اللى بتربى بنات همها كله صيد العرسان؟ ... لأ ده مش وقت تصفية الحسابات ... خلينى فى الجواب

أنا اتأكدت بقى انى بحبك لما رفضت كل عروض الشغل اللى جات لى بره ... و اتأكدت اكتر انى بحبك لما وقفت ادرس للطلبة و اديت لهم كل خبرتى فى الشغل و الحياه ... و اتأكدت تماما انى مش ليا غيريك وطن لما رفضت كل رجل كان عايز يتجوزنى و قال كلمة وحشه عليكى ... قال كانوا عايزينى اتجوز و اسيبك! و الله يا مصر انتى حمالة قسية ... الارهاب و القنابل و ضربات السياحة و ضربات الاقتصاد و سياسة خارجية متلصمة و سياسة داخليه ... متلصمة برده و ناس بتكرهك و هى بتاكل من خيريك و ناس تخلت عنك و لا مؤاخذة باعتك عند أول ناصية و ناس حراميه و مرتشية و نصابة ... فى برده ناس غلابة و كافية خيرها شرها ... انت فعلا أم الدنيا

من كام يوم ابتديت احس انى خايفة منك ... خايفى على بيتى و على قططتى و على أصحابى و على عائلتى ... خايفة أكون حبيت غلط تانى! ماما كمان خايفة منك ... تخيلى انها خايفة عليا منك؟ ماما قالت لى خليكى فى العلاقات العاطفية و سيبك من السياسة ... سياسة ايه؟ انا مش فاهمه أصلا يعنى ايه سياسة ... هو الجواب ده سياسة؟ هى ماما ليه خايفة منك يا بلدى؟ ليه سماح صاحبتى بتقول لى أوطى صوتى؟ هو أنا زعلتك فى حاجة؟ ليه سماح كمان خايفة منك؟ ليه نيرة خطيبة محمد الشرقاوى الناشر بتاعى بتعيط؟ ليه محمد مش بيشوف شغله فى دار النشر بتاعته ... ده عليه ديون و التزامات! ده أهل نيرة كدة ممكن يفسخوا الخطوبة ... الرجل مستقبله راح! و مين اسراء ديه و اتقبض عليها ليه؟ هى كانت بتعبر عن رأيها من غير ما تأذى حد. هو انتى يا مصر مش بتحبى حد يقول رأى مخالف لرأيك؟ انتى كده هتعملى زى
بابا ... و بابا فى كلام كتير من اللى كان بيقوله طلع غلط! يا ترى يا مصر هتردى عليا و لا هتسبينى متلخبطة كده؟

23 comments:

Anonymous said...

مصر هى كمان زى و زيك و زى كتير هى كمان بتصرخ مش شايفه نيلها بيصرخ من القذارة اللى مليته و خرج بره النيل ماهو ده صراخ و صوت النيل مش شايفه زرعها بيصرخ من المبيدات اللى فى ارضها و خلا الزرع دبلان مكسوف كله امراض ماهو ده صراخ و صوت الزرع مش شايفه سماءها اللى بقيت سوده فى النهار زى الليل من التلوث و المصانع اللى جوه المساكن ما السواد صوت صراخ سماء مصر مش شايفه الارض اللى كلها حفر عشان معموله من الاصل غلط وقعت و باظت من كام عربيه مشيوا عليها فى يوم و لا اتنين مش اكتر
بصى على الشجر اللى ما بقاش يطرح الشجرة هى بس اللى بتموت واقفه فهمتى اققصد ايه
مصر نفسها بتصرخ و بتزعق و هى كمان عايزه حد معاها و عايز حد يرد عليها
صعبان عليها نفسها ما هى متستهلش كده
بلاش احنا كمان نيجى عليها و نظلمها معانا بلاش نحمل مصر ذنوبنا و اخطائنا و عيوبنا و الوهن اللى صابنا.

Marwa Rakha said...

ليه من غير اسم؟

Unknown said...

ماحنا اتفقنا على موضوع من غير اسم ده يا مروة
المهم الجواب:
اول يوم شفتك قلتيلى انك بتحبى مصر و صراحة استغربت بس بعد كده قلت لنفسى " امال يعنى انتى متخيلة بنى آدمة زى دى هتعد فيها و هى مش عايزة؟"
بس فضل جوايا برضه السؤال .. السؤال اللى بسأله لنفسى
انا ليه رغم كل النكد و الهم ده برضه بحاول يبقالى حياة هنا
عشان بلدنا عاملة زى درجة من درجات الحب الغير مشروط العليا اوى
ساعات بحسه علاقة غير صحية لينا عشان لو حكمنا عقلنا و قوينا هتقفلى انتى عليها فى الصندوق الاسود و هارميها انا فى الدى & بى .
بس احنا مش عايزين كده
ساعات بحسها مهما هانت و جرحت و عورت فينا برضه هانسمحلها
كل اللى بنعمله شوية خربشة كده و خلاص

Marwa Rakha said...

حياتى:) والله انا قلبى وجعنى و مش عارفة أعمل ايه ... انا بينى كبرت و خرفت:) انا عمر ما فرق معايا الكلام ده

طفل صغنون said...

يا دي النيله
مش عارف انا قليل البخت .....ولا قليل الحيله
كل اما اقول قربت خلاص......الاقي السكه لسه طويله
يا دي النيله
ده انا م الصبح بعدل فيها......باي وسيله
وكل اما احاول افرح......تطلع مني الضحكه حزينه
بص بقي هو الحظ.....و الدنيا بجد بجد بخيلة
مفيهاش فرح......و مفيهاش قمح....و مفيهاش قطن طويل التيلة
هي الناس مبقتش بتفرح ليه
في المواسم.....حتي كل سنه وانت طيب.....بقت تقيله
لكن عارف...رغم الخوف...و النار....و السكينة
لسه بلدنا ..... فيها حاجه جميلة
ومن ابداعات على سلامة
كلنا حاسين بكدة
انتِ وانا وعلى سلامة وصلاح جاهين من زمان لما كتب على اسم مصر
ده كله علشان جوانا احساس ان مصر ملهاش ذنب فى اللى بيحصلها احنا السبب علشان سيبنا نتحكم فينا واحنا مش بنعرف نتحكم فينا كان يحصل ايه يعنى لو كنت اتولدت بره حبيبتى وسيبتها فى حالها وملهاش دعوة بشرى
بس احنا فيها وان شاء الله هنحليها ومش هنخليها تعوز اى حاجة
ولا هنخليها تشتكى من اى حاجة طول مافى زينا كتير بيحبوها

طفل صغنون said...

يا دي النيله
مش عارف انا قليل البخت .....ولا قليل الحيله
كل اما اقول قربت خلاص......الاقي السكه لسه طويله
يا دي النيله
ده انا م الصبح بعدل فيها......باي وسيله
وكل اما احاول افرح......تطلع مني الضحكه حزينه
بص بقي هو الحظ.....و الدنيا بجد بجد بخيلة
مفيهاش فرح......و مفيهاش قمح....و مفيهاش قطن طويل التيلة
هي الناس مبقتش بتفرح ليه
في المواسم.....حتي كل سنه وانت طيب.....بقت تقيله
لكن عارف...رغم الخوف...و النار....و السكينة
لسه بلدنا ..... فيها حاجه جميلة
ومن ابداعات على سلامة
كلنا حاسين بكدة
انتِ وانا وعلى سلامة وصلاح جاهين من زمان لما كتب على اسم مصر
ده كله علشان جوانا احساس ان مصر ملهاش ذنب فى اللى بيحصلها احنا السبب علشان سيبنا نتحكم فينا واحنا مش بنعرف نتحكم فينا كان يحصل ايه يعنى لو كنت اتولدت بره حبيبتى وسيبتها فى حالها وملهاش دعوة بشرى
بس احنا فيها وان شاء الله هنحليها ومش هنخليها تعوز اى حاجة
ولا هنخليها تشتكى من اى حاجة طول مافى زينا كتير بيحبوها

Anonymous said...

الاسم مصريه او مصرى لسه بتحب او بيحب مصر و حتفضل تحب مصر و بتعتذر ل مصر على اخطائنا فى حقها
افضلى اكتبى بالعربى خلينا كلنا نكلم لغه واحده
ما هو حتى خلونا واحد يكلم عربى و واحد انجليزى و واحد فرنساوى و واحد المانى و لسه ...عشان نبعد عن بعض اكتر و يبقى كل واحد بيكلم بلغة مختلفه عن التانى
خلونا نكلم و نكتب عربى

Askandarani said...

مصر دي مش امبارح و النهارده و بكره مصر من 7000 سنه من 500 سنه فاتت و 100 سنه ادام. احنا الي بهديلناها خلينا ناس تبهديلها و تبهديلنا معاها يعني ايه 30 سنه في عمر مصر

بادعي ربناكل يوم يوم اعيش و اشوفها نظيفه و زي مقولتي بنعلم الناس بس مش بس علام الكتب و كمان بنعلم مسئوليتنا نحيه مصر. مصر مش نظام ولا حزب مصر دي احنا

Anonymous said...

ايه دا
مروة بتكتب بالعربي؟؟؟؟
انا فعلا افتكرت اني دخلت بلوج غلط و قعدت ابص علي اسم البلوج 5 دقايق زي الاهبل
ههههههههههههههههههههههه
و بعدين قلت يا واد دا اكيد حد باعت لها رد و هي بتنشره

البوست جميل و احلي حاجة في كتابات مروة ان كلامها بيطلع تلقائي و من القلب

اي نعم القارئ مش حايشوف كتابات تقليدية و في الغالب حايطلع من هنا مصدوم بس دي مش غلطة مروة لأن الست دي بتتكلم صح و عندها منطق و صراحة



تحياتي و تقديري
اللهو الخفي

Prince said...

ههههه تعرفى انى كنت فاكر انك مش بتعرفى تكتبى عربى :p
طب كويس اهو تغيير والواحد بقاله كتير ماكتبش عربى كمان :) وحشنى العربى وعشان كده هأكتب كمان بالفصحى مش بالعامية :)
فى رأيى..العلاقة بين مصر وأهلها تشبه علاقة الزوج والزوجة المصريين..مهما يحدث بينهما من مشاكل...مهما تتلاعب بهم الحياة ومصاعبها..ومهما تصاعدت الأزمات وسائت الظروف..فى النهاية يظلان سويا مترابطى الايدى..وحتى عندما يقسو الزوج على الزوجة ويتسائل الكل فى دهشة لماذا تتحمله الزوجة؟ هل لأنها تحبه؟ هل فقط من أجل الأطفال؟ هل وألف هل؟ وفى النهاية لايمكن لأحد أن يعرف السبب..
ومصر كذلك مهما تقسو علينا...مهما فسدت سياستها...مهما ظلمها وظلمونا حكامها...ومهما قال الجميع ان مصر لم تعد بلد الأمان...يظل ذلك الأحساس بالغربة يراودنا عندما نبتعد عنها..يظل ذلك الاحساس بالغيرة يقتلنا اذا أخطأ شخص ما فى حقها..ويظل ذلك الاحساس بالمرارة يعتصرنا حين نرى من يسرقها ويخرب فى أرضها..بعضنا يغضب فى صمت..بعضنا يخرج فى تظاهرات تقلب الى حوادث مؤسفة..فما علاقة الأعتراض بحرق المدارس؟ وبعضنا سلاحه قلمه..يطلق مداده فى وجه كل من يحاول تشويه الصورة التى اعتدنا عليها لمصر..
وبعضنا...وبعضنا...مهما اختلفت ردود أفعالنا لانختلف على تلك الحقيقة..كلنا بنحب مصر..
عايزة اختم كلامى بالعامية :) واحدة زميلتى فى الجامعة قالتلى من يومين انها عايزة تسيب مصر بأى طريقة وتسافر لأى بلد عشان الحوادث اللى فى مصر دى وكده..وتبقى ترجع لما مشاكل مصر تتحل..قلتلها حاجة بسيطة..
"لو كل المصريين قالو زيك كده هنصحى فى يوم الصبح نلاقى مصر كلها هاجرت ومش هيفضل حد اصلا عشان يحل مشاكلها"
زمان كانو المصريين صابرين قدام حرب من بره مصر..دلوقتى احنا مش قادرين نصبر قدام حرب من جوه مصر؟
وعجبى, على رأى عمنا صلاح جاهين :)
مش عارف أشكرك ازاى يامروة عشان خلتينى اشارك فى الجواب ده لمصر :) كانت وحشتنى اوى :)
سلام :)

HeNaWy said...

even though i always thought of you as this up town cool girl who doesnt know whats going on here :)..
this post is very touching really
reminds me with these words for salah gaheen

على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكة الأرض شرق وغرب
وبحبها وهي مرمية جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب

Anonymous said...

بنتي الغالية مروة...

بقالك كتير ما بعتيليش جواب بالعربي ... أنا قلت انتي نسيتي العربي خلاص ... و لغت الأجانب اللي مش بفهمها بقت لغتك الأم ... و خايفة زي ما بعض إخواتك عاملو يبقى الغرب كمان و طنك الأم و تنسيني يا مروة... تنسي الأم اللي كبرت و ربت
أنا مش مستغربة انك بتكتيبيلي !!! .. بلعكس ده أنتي بنتي و عمر الدم مايبقى ميه يا مروة يا بنتي ...

قلبك عليا و زعلانة عشاني أه ه ه ه ه يا مروة أنا كمان تعبت أوي المرض هدني
الفساد ما بيسبنيش و الظلم عالي عليا دايما و القهر كسر عضامي ... حاشكي من اية و لا اية ؟ و مين يسمع ... !!!
أنا طبعا فاكرة لما سافرتي يا مروة.. فاكرة قد اية زعلت لما مشيتي زي إخواتك اللي مشيوا , و قد اية قلبي وجعني لفراقك .. و فراق إخواتك ... اللي سابوني و سافرو و راحو يدوارو على الحنية في حضن الغريب و أمهم لسه عايشه على وش الدنيا ... يا خسارة !!

أنا عارفة إني مزعلاكي أنتي و اخواتك ... عارفة إني مابقتش اعملوكو أكل حلو بس عمك ما بقاش يشوف شغلوا في حتيت الأرض اللي ورثها عن أجدادك و المحاصيل بتترش كيماوي و الخضار بدل ما كان بيتوصفلنا بدل دواء بقى يتوصفلنا دواء بعد ما ناكلوا و عارفة أن البيت مبقاش نضيف زي زمان بس أنا حيلي اتهد من خدمة إخواتك و هما مصرين يرموا زبالتهم جوا بيتهم .... تعبت أقول مايصحش كدة لازم نكون نضاف و ريحتنا حلوة... . و كمان لساني أتدلدل أقولهم عندنا ضيوف أجانب بيجوا يزوروا خالكو من برة عشان شغلوا في شركة السياحة اللي بيجيبلنا فلوس كتيير ... لازم نكون مؤدبين و مثقفين و عندنا حسن ضيافة ... ولا بيسمعولي .... لما تعبت ... تعبت قوي يا مروة ... والحمل بقى تقيل عليا قوي و الظروف مش مساعدة!
بعد ما ابوكي مشي على برة مع اللي مشيوا ... قلت اتسند على بقيت خلانك و عمامك.... بس كلهم خذلوني و مشيوا كمان ... طاب أنا حاعمل ايه و لا ايه يابنتي قوليلي !

يا رتها بس جات على اللي سافروا و سابوني ... الأصعب من كده اللي فضلوا قاعدين بس عاقوني يا مروة و عصوني عاقوا أمهم !!!
ماسمعوش كلامي ... صوتي اتنبح و محدش سامعني ... يا أبني ذاكر عشان تنجح و تبقى دكتور يعالجني و تخفف جراحي ... يا بينتي شدي حيلك عشان تبقي مهندسة قد الدنيا و تبنيلي و توسعي عليا ... تعبت أقول يا أحمد يابني الكدب حرام , يا جرجس يا بني الغش حرام , يا مريم يا بنتي النصب حرام... يا حسني يابني الظلم حرام !!!... يا فاطمة يا بنتي المحسوبية و الوساطة مش هيا السكة الصح ...و محمد و عيسى و مني و داليا و كلهم... كلهم تعبوني صوتي اتنبح يا ناس...
غصب عني اللي أنا فيه يا مروة, أنا نفسي أكون أحسن أم .. و نفسي أشوفكو أحسن ناس ... بس حكم القوي على الضعيف ...

الحتة دي و جعتني منك اوي يا مروة .....

" مش انت اللى بتخلى الستات تتحجب و انت برده اللى بترفضى انهم يظهروا فى التليفزيون أو يشتغلوا فى الشركات الكبيرة؟ مش انت برده اللى بتخلى الست مكسورة و تحت رحمة رجالة مش ليهم صلة بالرجولة غير أعضائهم التناسليه؟ مش انت اللى بتربى بنات همها كله صيد العرسان ؟ "



أنا يا مروة !!!!... حتى أنتي ظالماني ... معلش .. مانتي بنتي برضة .. و لاونها بتوجع أكتر عشان من القريب ... مش كفاية اللي قالوا عني الغريب يا مروة ..

مش أنا يا مروة اللي تكون كدة أبدا ... أنا تاريخي و دياناتي كرموا الست و عززوها ... أنا أم الفراعنة و أم الفلاحين و أم الصعايدة أنا اللي ربيت الفلاحة اللي بتزرع و تحصد و تربي و لا ميت راجل ... و الصعيدية اللي كلمتها تهز رجالة بشنابات و الكل بيشورها عشان حكمتها و عقلها ... و البنت الجدعة اللي مسكت مديرة شركتها على خمسين راجل بيسمعولها... و الست اللي بتغسل و تكوي و تأـكل و تشرب و تحن و تحب كل دة و بتشتغل كمان أنا أم المديرة و الدكتورة و المهندسة و المدرسة ... أنا أم مريم و أم فاطمة .... و كل النماذج الهايله دي .. و نروح بعيد لية؟؟؟

أنا أمك يا مروة أم الكاتبة اللي صوتها وصل لكل الجيران القريب و البعيد .. أم البنت اللي تفكيرها حر و صوتها من دماغها اللي مش بتخاف من الحق .. اللي ماتسكوتش على الظلم ... اللي عاتبتني عشان بتحبني .. و عايزه مصلحتي .. . زي ما شيلتها و هي صغيرة مش عايزه تسبني لما كبرت في السن و احتجتها جنبي ... بتعاتيبني ... زي بعضوا ما أنتي ينتي يا مروة ... بنتي اللي رفضت تسيب حضني و تمشي مع اللي مشيوا .. بنتي الي ماقبلتش تسمع كلمة وحشة في حقي ... مع أني بأعترف إني بقيت حاجة صعبة قوووي !
بس منه لله اللي كان السبب في اللي وصلتلو ... اللي كان السبب أن ولادي يعاقوني و مايسمعوش كلامي و يعملوا كل اللي بتقولي علية و اكتركمان ...

أوعي تخافي مني يا مروة أنا بحبك و الله ,.. أنت و كل أخواتك و كل قرايبك و معارفك .. بحب قططك و بحب سماح و الله بحب نيرة و محمد ... و نفسي أساعدهم بس للأسف مش كل ولادي زيكوا كده يا مروة أخواتك اللي أتقلبوا عليا و عصوني ..أنا قلتلهم و الله ... قلت ماتظلمووش ما تفترووش ما تقهرووش ... يا خسارة ماسمعوش كلامي ..
أه ه ه ه يا محمد يا شرقاوي يابني .. تتبهدل و أمك عايشة ... و فييين !!! في قلب بيتك ..
يا ولادي حرام عليكواااا حرااام تعملوا كدة في أخواتكو و تقولوا ماما هيا اللي قالت ... يتقطع لساني إن قلت أأذي حد من ولادي ... دا أنا والله قلبي انكسر من وجعي عليك يا شرقاوي يابني ..و من حزن نيرة خطيبتك و كسر خاطرها... من خوفي و قلقي عليكي يا إسراء يا بنتي ....

بقى أنا يا مروة مش بحب اسمع رأي مخالف لرأي !!!.... أنا والله بحبوكو كلكو و بسمعكو بس بقيت عيالي حجروا عليا !! و أنا في كامل قوايا العقلية يا مرو’ .. اخدوا مني كل الصلاحيات و علوا صوتهم عليا ... مابقتش عارفة اسمعكو ...مش عارفه اسمع اللي طمرت فيهم تربيتي ... . حاسة إني حتشل ... مش عارفة اعمل أية يا ناس قولولي !

ربنا يرحني و يريح قلبك يا مرو يا بنتي و يصاح حالكو يا ولادي .....

أمك حمالة الآسيه / مصر

Anonymous said...

Dear Marwa,
Indeed I was shocked by ur words,I perceived u to be better words chooser,2ndly Egypt doesn't force u to wear HEGAB,as u don't.it's Islam which orders females to do so to control the community relations and prevents the the devil to create bad thoughts.
I think u can accept my critic

Marwa Rakha said...

يا طفل يا صغنون ... احنا لسة بنسأل البيضة الأول ولا الفرخة ... نقول للناس تغير من نفسها يقولوا لما الحكزمة تتغير و البلد تتعدل و نقول يا بلد اتعدلى تقول و انا ايه من غير ناس ... الناس قرفانة و كفرت بالبلد

Marwa Rakha said...

يا انونيموس ياللى كتبت بعد طفل صغنون

اللغة وسيلة تعبير بلاش نحملها فوق طاقتها ... المهم نتكلم و نعبر و نعلى صوتنا ... بالعربى ولا بالانجليزى ولا بالموسيقى و الرسم ... اى تعبير و خلاص بدل صمت الاموات

Marwa Rakha said...

اسكندرانى ... باين كان فى درس عن الوطنية فى مادة التربية الوطنية ... بس فى مدرسين طمسوا معالم الوطنية لانهم بالعافية عايشين ... يقف الراجل ازاى و يعلم تحيا مصر و هو مطحون

Marwa Rakha said...

يا لهو يا خفى ... اهلا بيك:) منور

Marwa Rakha said...

اهلا Prince

هو مين الزوج و مين الزوجة هنا؟ لو سألت الشعب هيقولوا انهم الزوجة المقهورة و لو سالت البلد هتقول انها الزوجة المقهورة ... تفتكر ممكن تكون الحكومة هى الزوج المفترى و الشعب و البلد ضرتين؟

Marwa Rakha said...

Hello Henawy:)

Me up town and cool?:)

No .. I am your average middle class Egyptian girl:)

Marwa Rakha said...

Maya .. thank you again:)

HeNaWy said...

to anonymous...ely ba3d maya...
if though that its islam who requires from girls to wear hejab and it should..yet most of the girls wear it just for the sake of ppl saying she is a good and maybe relegious or "moltazema" not bcz they like to wear it. not to mention that some families force their daughters to wear it

Marwa Rakha said...

Hello Anonymous who was shocked by my words:)

Yes I do accept your criticism BUT here is my elaboration on that point - copied and pasted from my reply on facebook to a similar question:

الحجاب بقى عامل زى ما يكون الزى الرسمى ... بنات كتير لابساه و مش فاهماه و لا مقتنعة بيه .. ده فى بنات بتقلعه لما تيجى تتصور و فى الافراح و لما تكون عاملة شعرها ... فى بنات بتلبسه فى الشارع بس لكن فى الشغل او فى الزيارات بتقلعه ... علشان كده بقول انه بقى عامل زى ما يكون زى رسمى

الغريب بقى ان فى الانترفيو الناس مش بترضى تشغلهم غير يا سكيرتيرات يا فى الحسابات ... يعنى مطعم مش هيشغل ويترس محجبة علشان مش منظر - على حد تعبيرهم!! او قى التسويق و المبيعات و العلاقات العامة لانهم مش بريزينتابل كفاية ... انا ليا صديقات كتير محجبات .. دراستهم شبه دراستى و مخهم زى الفل و اترفضوا لانهم محجبات

ده فى واحدة لسه حاكيالى حكاية .... هى محجبة و كانوا عايزنها تعمل برنامج زى بتاعى كده على الاعمال الفنية و الديكور ... يعنى هى مش مذيعة لكن عندها فقرة ثابتة .. و لما المعد سألها .. انت محجبة و لما هى قالت ايوة ... الموضوع خلص

تعال نسال كده و نشوف ... ليه البنات فى الخارجية فى مصر ممنوع الحجاب و لو اتحجبت لا هتسافر ولا هتترقى

ليه مصر للطيران مش فيها مضيفات محجبات و لو اتحجبت تنزل ارضى او تقعد فى بيتهم

ليه القناة الاولى و التانية و النايل مش فيها محجبات ... هى المذيعة المحجبة مش منظر

ليه فالانترفيو الناس بتفرق ما بين المحجبة و الغير محجبة؟

مش انا اللى عاملة الفرق ده ... انا مش بيفرق معايا ايه اللى على راسك المهم ايه اللى جوه راسك ... لكن الناس هى اللى بتظلم و بتحاكم ... فى اى بلد تانية المحجبة واحده ست عادية و مؤهلتها هى الفيصل ... حتى فى امريكا مش بس الدول العربيه ... انا مش بس بدافع عن حق الغير محجبة فى لبس البكينى ... انا بدافع عن حق اى انسان انه يعيش حياته فى جو مش فيه زيف و لا نفاق

الاب اللى بيقول بنتى بارك الله فيها اتحجبت هو نفس الرجل اللى فى الشركة بيرفض تعيين مديرة تسويق محجبة .. فهمت قصدى؟

Anonymous said...

اشمعني انا بس اللي اخدت اقصر رد؟

هو انا بقيت البطة السودا في البلوج دا؟

يالا مش مشكلة

كلمتين حلوين من مروة احسن من مليون دولار

كده كده الدولار سعره نازل اليومين دول


:)

اللهو الخفي