مونتيسوري مصر

مشاكل القراء المسجلة

Delivered to your Doorstep

Enter your email address:

Delivered by FeedBurner

Friday, April 18, 2008

لغة الضاد

أنا الظاهر كده ايدى أخدت على العربى و بقيت كل ما أتضايق من حاجة فى مصر أو تخص مصر بقيت باكتبها بالعربى علشان أضمن انى اتفهم صح. الحكاية النهارده ان كل كام يوم واحدة صديقه تبعت لى لينك لمقالة منشوره على النت عن الكتاب بتاعى - شجرة السم - أو
The Poison Tree
و كل مرة قلبى بيطير من السعاده ان فى ناس قرأت الكتاب و قررت تكتب رأيها - حلو ولا وحش ده مش موضوعى خالص لان انا من المدرسة بتاعه حرية الرأى و احترام الآخر و الكلام ده. و كل مرة أفتح اللينك أصاب باحباط شنيع لأن الكاتب أو الكاتبة لم يتناول الكتاب و لا الكلام اللى انا كاتباه فى الكتاب و باكتشف ان انا و كتابى تحولنا الى "ظاهرة" على حد تعبيرهم و تعبير النقاد اللى عبروا عن رأيهم ... هل أنا ظاهرة لأنى بنت مصرية بتتكلم عن عذرية الفتى و الفتاه؟ لأ طبعا !! طيب هل انا ظاهرة لانى بنت مصرية بتقول بابا و ماما و كتير من الآباء و الأمهات كلامهم طلع غلط؟ لأ برضه ... طيب يمكن لأنى بتكلم عن الخيانة و عن الازدواجيه وتجربتى مع المواقع الاباحيه و الكلام الغريب ده؟ أبدا

انا بقيت ظاهرة و اتعمل عليا "قعر مجلس" علشان انا فلحوصة و بكتب بالانجليزى ... انا مش عارفة فين الظاهرة فى كده؟ مين اللى بيكتب فى الاهرام ويكلى و الجازيت و الديلى ستار و ايجبت توداى و بيزنس توداى و كامبس و انيجما و انسايت و ايدينتيتى ولايف و غيرها من المجلات و الجرائد الصادرة باللغة الانجليزية فى مصر؟ طيب و المراسلين بتوعنا فى بلاد بره؟ و اللى بيقروا نشرة الاخبار باللغة الانجليزية على قنواتنا ... ما احنا كلنا مصريين .... امال اللى بيتخرجوا من السن و أداب انجليزى و غيرها من الجامعات اللى بتخرج ظواهر غريبة زى حلاتى يروحوا فين؟ ولا يدرسوا ليه أصلا؟

و اللى زود الطينة بلة الناس اللى بيقولوا ان الكتب باللغة الانجليزية مش ليها جمهور!!!! يا سلام على الفتى و النصاحة!! يعنى كل المجلات و الجرايد اللى انا رصتها فوق ديه الناس بتقلى عليها بطاطس؟ و كتابى اللى بايع أكتر من 700 نسخة فى 3 شهور ده برضه خيالى المريض؟ و الجروب بتاع الكتاب على الفيس بوك اللى عدى ال 700 مشترك برضه هلاوس مصاحبة للظاهرة؟ انا مش عارفة المشكلة فين ... هل هى قصر ذيل - لا مؤاخذة - و لا هى فضا و اناشيد و شعارات عليها التراب و لا ممكن تكون خوف من التطور .. اه ما انا كده متطوره و كتابى عدى حدود مصر لانه بلغة عالميه! و لا هو نقد و خلاص؟

يعنى ايه غيرة على اللغة العربية؟ كل شويه حد يقول ان انا و الظاهرة بتاعتى تهديد للغه و اهانة لجلالتها!! يا قوم .... فى حاجة اسمها مواكبه العصر و فى حاجة تانية اسمها التميز و فى حاجة تالتة اسمها اختلاف الأذواق و الاحتياجات و فى حاجة أهم اسمها حريه التعبير و كل واحد من حقه يعبر باللغة اللى تعجبه أو بالأداه اللى تريحه. و بعدين مش لازم ننسى تقبل الآخر .... تقبل حد فكره و شكله و كلامه مختلف عنى ... يعنى هل انا عمرى هاجمت حد بيكتب بالعربى مثلا و قلت ده تخلف؟ طبعا لأ ... مش من حقى!! و مش من حق أى حد مهما بلغ علمه انه يحقر منى و لا من افكارى و لا من كتابتى و لا من اللغة اللى انا اخترتها و لا من الجمهور اللى بيقرا لى. و بعدين ما انا شفت كتاب شباب زى الورد كتبوا بالعربى ... و اتهاجموا هجوم المرتدين علشان كتبوا بالعامية ... و فى ناس تانية اتهمتهم انهم عار على الكتابة لأنهم احتاجوا مراجعة لغوية ..... اسمه ايه بقى ده؟!!! مش عيب كده و لا هو نقد و السلام و صوت عالى و خلاص؟

8 comments:

Unknown said...

مفيش حرية يعني مفيش نقد

وده على مستوى يشمل جميع أنشطة الحياة

Anonymous said...

اعملي اللي انتي مقتنعة بيه انو صح

اكتبي باللغة اللي تحبيها

ناس كتيرة جدا فخورة

بأن مصر فيها مروة رخا

دا مش كلام دي حقيقة


عمرو

Unknown said...

إيه الحكاية .. إنتي و بعدين أميرة جلال قررتوا تكتبوا بلغة الضاد
هي موضة ولا إيه

Marwa Rakha said...

elaborate ya Mohamed:)

Thanks ya Amr . thanks a lot for your supportive comments:)

Tarek .. I still write in English mainly but I chose to write in Arabic this post to make sure people understand

Shimaa Gamal said...

Marwa,
Qassem Amin's book that played the most important role in changing the women;s status in modern Egypt was written in French and guess what he was critisized for using a different language too.
Anyway Egyptians don't read, neither in English nor in the sacred Arabic.

el kelab ta3wey wal kafela taseer :)

Marwa Rakha said...

I did not know that Shimaa ... sigh

Anonymous said...

انا بعتبر العربي اللى يستخدم الانجليزى فى مخاطبة عرب عنده نوع من انواع الخلل النفسي

انما اللى يستخدمها مع انجليز او عشان يتعلم و يستزيد من الثقافة الغربية مفيش مشاكل

Miss. Sosa said...

i love ur title realy ...gohead n but u have to accept any thing easly dnt bother ur self ...n deeply i like ur blog