مونتيسوري مصر

مشاكل القراء المسجلة

Delivered to your Doorstep

Enter your email address:

Delivered by FeedBurner

Tuesday, March 31, 2009

المصرى بين الأنانية و الأنامالية و السلبية

الشهر دا فعلا شهر زى الزفت عليا ... احتكيت بجين الندالة المصرى أكتر من مرة ... انا مش هاتكلم عن مشاكلى الشخصية مع مدونين او اعلاميين .... انا هاتكلم تانى عن رد فعل المدونيين المصريين تجاة قضية الحسبة المرفوعة على مجدى الشافعى كاتب رواية مترو و محمد الشرقاوى الناشر. زى ما يكونوا مستخسرين الكام دقيقة اللى هيقولوا فيها حرام كفاية ... زى مايكونوا مش فارق معهم مادامت النار ماطالتهمش .. ندالة و لا مش ندالة؟ انانية و لا مبالاة و لا ليها اسم تانى؟

قال المدون اللى مش فارق معاه: و انا هاعمل ايه يعنى و كلامى هيفيد بإيه؟

ردى: جرنان الاهرام بيطبع حوالى 2 مليون نسخة و معدل القراءة من اربعة ل ستة مليون حسب اليوم و الصفحة و طبعا مش كل الملايين دى بتقرا الجرنان حتة حتة ... يعنى اجدعها كاتب بيقراله بتاع مليون ... دا اولا

ثانيا جرنان النهاردة بكرة بقى اخبار بايتة و لو حد عايز يطلع خبر اتنشر من سنة هتطلع روحه ... دا ثانيا

ليه بقى صفحة المدون بقت سلاح فتاك و كل كام يوم يطلع صحفى كبير يشتم فى التدوين .... علشان انتم منافسة .. كل مدون منافس قوى جدا لكل صحفى بيكتب فى جريدة مطبوعة

اولا انتم عندكم ارشيف من سنة سيدنا نوح
ثانيا لكل واحد قرائه من مصر و من برة
ثالثا فى تدوينات بتترجم
رابعا القناوات مش لاقية حاجة تتكلم فيها فبيدوروا على مواضيع عندكم .. اه و الله
خامسا حتى لو كلمتكم نقطة فى بحر ما ينفعش تبخلوا بيها على البحر

قال المدون اللى مش شايف غير تحت رجليه: انا أصلى ضد شرقاوى و مش باحبه
ردى: انا ممكن اكون مش طايقة شرقاوى و ماعرفش مجدى الشافعى و ما قريتش الروايه و لو قريتها مش عاجبانى و مع ذلك هقلب الدنيا على قد ماقدر على دماغ اى حد عايز يكتم صوت كاتب و لا مفكر و لا حتى انسان عادى

الموضوع موضوع مبدا .... حرية الرأى ... حرية التعبير .... كل واحد حر

اما موضوع ان القضية كسبانة كسبانة

هو احنا لازم نستنى لما يتحكم على واحد مننا علشان نتحرك ... لازم دايما نستنى البلا لما يقع؟

ثانيا مين اللى قال انها كسبانة؟
مش هيبقى اكبر من جمال الغيطانى و لا حلمى سالم و لا احمد عبد المعطى حجازى و لا حتى نوال السعداوى

اقرا عن الاحكام و الغرامات
الاهانة مش فى الحكم و السجن و الغرامة .. الاهانة فى ان حد سمح لنفسه انه يتعدى حدوده و يحاول يخرس صوت و فكر انسان تانى

و احب أفكركم


"They came for the Communists, and I didn't object - For I wasn't a Communist;
They came for the Socialists, and I didn't object - For I wasn't a Socialist;
They came for the labor leaders, and I didn't object - For I wasn't a labor leader;
They came for the Jews, and I didn't object - For I wasn't a Jew;
Then they came for me - And there was no one left to object."

5 comments:

Anonymous said...

المدونين مايفرقوش عن عامة الشعب المصري
مش مستوردين من امريكا

صدقيني المدونين اغلبهم متخلفين و ممثلين كويسين

شوفي لما حسن الهلالي هاجم المسيحيين فى مدونته كل اللى كان بيقول انه لبرالي و علماني قعد يشتم و حسن الهلالي نفسه ابو العلمانية الانترنتية

سلميلي على المدونين المصريين اللي بيحركوا الراي العام

محمد حمدي said...

منا كنت حاضر الحوار ده وكنت هرد بس تراجعت فى اخر لحظه قرفا من حاله السلبيه اللى بقينا فيها .. عمرك شوفتى حد يهرب من السلبيه بالسلبيه؟ اهو ده انا

marianna said...

NO for metro confiscation and trial, Support freedom of arts and expression

Marianna Massa

الأغاني للرأفتاني said...

الحريه فى مصر عاوزه ترزى يفصلها بالطلب يعنى مش اى حد حر ومش اى حد من حقه يعبر عن رايه
يعنى المسيحى مش من حقه يبقى رئيس ولا المرأه من حقه تبقى اى حاجه
ولو الشرقاوى نشر حاجه مش على مزاجى اى حد يبقى يستاهل اللى ببحصله والامثله على الحريه المتفصله كثيره
واكبر دليل على ذلك التعليق بتاع المدوّن العبيط اللى حضرتك نشرتيه
والحريه الحقيقيه مش هنستاهلها لحد ما ننسى العنصريه الداخليه اللى بينا وبين بعضنا

Anonymous said...

على قد ما باشكرك يا مروه على قد ما انا حزين
بشكرك ان العالم كله بيتابع مهزلة القبض على " بنات" افكارنا بدعوى الاداب
للاسف نحن مهددان و يمكن نتسجن لمدةسنتين..
و حزين لكل هذا التفتت
الناس مشغولة بنفسها و بس
الانانيه ح تقضى عليهم كلهم واحد ورا التانى
لكن فيه ناس بتدى المثل
يا جماعه لو ما احتفيناش بعقليتنا و ابتكارنا و سيبناهم للبوليس
مستنيين يطلع ايه م البلد دى
بس الحكومة دى نجحت
و الله العظيم نجحت
و احيانا بالاقى الناس معذوره .. وقفوا ورا ناس طلعوا اوهام وقفوا فى مواقف ما اتحققتش
المهم هنا هو عدم الاستسلام
و لما تقف فى المحكمة او تساند باى شكل تعرف انك بتساند حرية الفكر اولا من الدعفلة فى خطط الديموقراطى الشهيرة : لبس الزبون فضيحة و الناس عليها الباقى
ارجو الوقوف مع المبدأ قبل الاشخاص
و ارجو اننا نكون اشخاص عند حسن ظنكم
بس اللى اوعدكم بيه بلاش تستنوا مننا اننا انبيا او كده
طولت عليكم
بس

مجدى الشافعى